Foto: Májilis otyrysy
Depýtat Ermurat Bapi "Zańsyz satyp alynǵan aktivterdi memleketke qaitarý týraly" zań jobasyn synǵa aldy, - dep habarlaidy Massaget.kz.
Májilis otyrysynda depýtat Magerram Magerramov zań jobasyn tanystyryp, baiandama jasaǵan bolatyn.
Baiandama aiaqtalǵannan keiin depýtat Ermurat Bapi sóz sóiledi.
"Meniń oiymsha, talqylanyp otyrǵan zań jobasynyń áý basta qoiylyp otyrǵan taqyryby aýqymdy emes. Eldiń aldyndaǵy aktivterdi qaitarý jónindegi problemany tolyq qamtityndai kólemde emes dep oilaimyn. Biz bul zańnyń kómegimen tiisti tergeý, zań organdary shetelge, Eýropa elderine, Batys elderine offshorlyq kompaniialarǵa, halyqaralyq transulttyq kompaniialarǵa, sheteldik bankterge shyǵýy kerek. Zańnyń taqyryby - zańsyz satyp alynǵan aktivter. Al Prezident Toqaevtyń 26 qarashada Úkimetke bergen tapsyrmasynda zańsyz shyǵarylǵan aktivterdi memleketke qaitarý týraly bolǵan.
Al myna jerde zańsyz satyp alynǵan aktivterdi deidi. Olar zańdastyryp satyp aldy onyń bárin. Sondyqtan, meniń oiymsha, aldaǵy ýaqytta talqylaý barysynda osy zańnyń atalý taqyrybyn aýqymdy qylý kerek. Prezidenttiń tapsyrmasy boiynsha, zańsyz shyǵarylǵan aktivterdi memleketke qaitarý jóninde bolýy kerek. Birden aitaiyn, osy zań jobasyn daiyndaý barysynda taǵy da múddeli toptardyń sabotajy boldy dep oilaimyn. Eger zańdy osylai talqylaityn bolsaq, biz taǵy Prezidenttiń saiasatyn qurdymǵa ketiremiz. Sondyqtan osyny qaperge alýdy suraimyn", - dedi ol.
Al Májilis tóraǵasy Erlan Qoshanov Ermurat Bapige usynys nazarǵa alynatynyn, alaida búgin zań jobasy talqylanyp jatpaǵanyn, tek reglament boiynsha jumysqa alynyp jatqanyn eskertti.
