Prezidenttik jastar kadr rezervine irikteý jobasy jalǵasady. Bul týraly QR Prezidenti Ákimshiligi basshysynyń birinshi orynbasary Máýlen Áshimbaev málimdedi, dep habarlaidy QazAqparat.
«Prezidenttik jastar kadrlyq rezervi - bir kúndik bastama emes. Muny elimizdegi basqarý júiesin jańǵyrtýdyń naqty tetigi jáne uzaqmerzimdi saiasat dep qarastyrǵan jón. Ázirge 300 adam tańdap alyndy. Olar jaýapty qyzmetterge taǵaiyndalady. Bul joba keiin de jalǵasady. Basqa da jastar kadrlyq rezervke enedi. Jalpy Prezident bul jumysty jalǵastyrý týraly naqty tapsyrma berdi», - dedi M. Áshimbaev QR Prezidenti janyndaǵy Ortalyq kommýnikatsiialar qyzmetinde ótken baspasóz máslihatynda.
Onyń aitýynsha, jobaǵa 300 adam ǵana iriktelse de, tizimge enbei qalǵan jastar nazardan tys qalmaidy.
«Tizimge enbei qalǵan jastardy umytyp ketpeimiz. Bárine kóńil bólinedi, onyń joldaryn, tetikterin qarastyramyz. Nemese olar kelesi irikteýde qaitadan qujat tapsyra alady. Qazirgi jeńimpazdar rezervte 5 jyl bolady. Biraq, bul 5 jyl boiy kelesi irikteý júrgizilmeidi degen sóz emes. Jastar ósip keledi. Jańarý protsesi júredi. Sol sebepti, irikteý odan da erte ótýi múmkin. Onyń naqty ýaqyty, jiiligi ulttyq komissiianyń otyrysynda sheshiledi. Ázirge, 300 jasty damytý, quziretin arttyrý jumystary kútip tur», - dedi Máýlen Áshimbaev.
Aita keteiik, Prezidenttik jastar kadr rezervine engen 300 úzdik qazaqstandyqtyń tizimi jariialandy. Tolyq tizimdi resmi saittan kórýge bolady.
