Túrkistan oblysynda tabysy az otbasylarǵa kepildik berilgen áleýmettik toptamalar berile bastady. Azyq-túlik sebetteri tótenshe jaǵdai kezinde kópbalaly jáne muqtaj januialarǵa aitarlyqtai qoldaý bolyp otyr, dep habarlaidy QazAqparat.
Memleket tarapynan áleýmettik toptama alǵan analardyń biri - Móldir Ótegenova. Túrkistan qalasynda turatyn kópbalaly ananyń alty perzenti bar. Beseýi mektep jasynda bolsa, kenjesi tórtte. Otaǵasy Ardaq Serdaliev bir mekemeniń kúzetshisi bolyp eńbek etken. Alaida jumys orny jabylyp qalǵan. Januianyń turmystyq jaǵdaiyn eskergen oblys ákimdigi qiyn-qystaý kezeńde tegin azyq-túlikter jetkizip bergen. Mundai qamqorlyqqa otanasy dán rizashylyǵyn bildirdi.
«Bizge ákelgen azyq-túlikterdiń ishinde makaron, táttiler,sút pen mai siiaqty eń qajetti taǵamdar bar. Balalar kóp bolǵan soń, tamaq ta kóbirek kerek. Óitkeni qazir barlyǵy úide bolǵandyqtan úsh mezgil tamaq jasaýym kerek. Osyndai qiyndyqtar kezinde bizge azyq-túlik jetkizip bergen bilik basyndaǵy azamattarǵa alǵysymyzdy bildiremiz. Men siiaqty kópbalaly analarǵa bul úlken kómek», - deidi Móldir Ótegenova.
Dál osyndai azyq-túlik sebetin túrkistandyq ana Faragat Aripova da alǵan. 32 jastaǵy kelinshektiń úsh perzenti bar. Tuńǵyshy 11 jasta bolsa, kenjesi 4-ke endi tolǵan. Otanasy taǵy tórtinshisine aiaǵy aýyr. Kúieýi ýaqytsha kólikpen jolaýshy tasymaldap tabys taýyp júrgen. Alaida tótenshe jaǵdai kezinde oǵan kóshege shyǵýǵa shekteý qoiylyp otyr. Sondyqtan januianyń turmys jaǵdaiy qiyndady.
«Meniń densaýlyǵym jumys isteýge jaramaidy. Baýyrym aýyrady, esepke alynǵanmyn. Kúieýimniń de turaqty jumysy joq. Balalardyń bir ǵana járdemaqysyna ómir súrý qiyn bolyp ketti. Al, memleket tarapynan azyq-túlikterdiń berilýi bizge kóp kómek bolyp otyr»,- deidi úsh balanyń anasy.
Túrkistandyq jalǵyzbasty ana Sevara Ábdrasilova da bala kútimimen úiinde otyr. Sebebi, kenjesi nebári toǵyz ailyq. Basynda baspanasy joq kelinshek búginde ata-anasynyń úiin panalaǵan. Páter jaldap turýǵa turmystyq jaǵdaiy múmkindik bermeidi. Osyny eskergen jergilikti ákimdik bul otbasyǵa da tegin azyq-túlik sebetin jetkizip bergen.
«Tuńǵyshym biyl tórt jasqa toldy. Balalarymnyń bári kishkentai bolǵan soń, jumysqa da shyǵa almaimyn. Ata-anammen turǵanymmen olardyń da balalary kóp. Tapqan tabystary ózderinen artylmaidy. Qazir karantin kezinde tipti jaǵdaiymyz qiyndap ketti. Al, memleket tarapynan berilgen azyq-túlikter bizge demeý bolyp otyr. Balalarymmen birge biraz ýaqytqa jetedi», - deidi Sevara Ábdrasilova.
