Batys Qazaqstan oblysynda kommýnaldyq qyzmetter baǵasy tómendedi. Bul týraly QR Tabiǵi monopoliialardy retteý komiteti BQO boiynsha departamenti basshysynyń mindetin atqarýshy Oralbek Qulmurzin málim etti, dep habarlaidy "Ult aqparat".
Memleket basshysy Qasym-Jomart Toqaevtyń tapsyrmasyna sáikes tótenshe jaǵdai kezinde 1 sáýirden bastap óńirde kommýnaldyq qyzmetter baǵasy arzandady.
Atap aitqanda, Oral qalasy turǵyndaryna «Batys sý arnasy» JShS-nyń sýmen qamtý qyzmeti qosymsha qun salyǵyn qosa eseptegende 1 m3 úshin 46,28 teńgeden 44,89 teńgege deiin nemese 3 paiyzǵa tarif tómendetildi.
Sol sekildi qala turǵyndaryna «Jaiyqjylýqýat» AQ-nyń jylýmen qamtý qyzmeti qosymsha qun salyǵyn qosa eseptegende 1 Gkal úshin 4 122,1 teńgeden 3 916,0 teńgege deiin nemese 5 paiyzǵa azaityldy.
Oblys turǵyndaryna «Batys Energoresýrsy» JShS-nyń elektrmen qamtý qyzmeti qosymsha qun salyǵyn qosa eseptegende 1 kVt/saǵat úshin 12,64 teńgeden 12,27 teńgege deiin nemese 3 paiyzǵa tústi.
«Aqsaijylýqýat» MKK da Aqsai qalasynyń turǵyndary úshin jeńildik jasady. Dálirek aitqanda, jylýmen qamtý qyzmetine QQS-men eseptegende 1 Gkal úshin 4 016,68 teńgeden 3 735,5 teńgege deiin nemese 7 paiyzǵa, sýmen qamtý qyzmetine QQS-men eseptegende 1 m3 úshin 51,25 teńgeden 47,67 teńgege deiin nemese 7 paiyzǵa jáne sý burý qyzmetine QQS-men eseptegende 1 m3 úshin 51,33 teńgeden 47,75 teńgege deiin nemese 7 paiyzǵa tarif tómendetildi.
«Gaz baǵasy QR Tabiǵi monopoliialardy retteý komitetimen retteletin bolady. Óńirdegi monopolist kásiporyndarǵa tótenshe jaǵdai kezinde bereshegi bar turǵyndarǵa kommýnaldyq qyzmet kórsetýdi toqtatpaýdy ótinip, usynym hat joldadyq», dedi O. Qulmurzin.
