Almaty oblysynda memlekettik áleýmettik paket alǵandar sany 83 myńnan asty. Olarǵa 455 mln teńgeniń azyq-túligi men qajetti zattary berildi, dep habarlaidy QazAqparat.
Naqtyraq aitqanda 455 mln 933 myń teńgege 83 091 adam áleýmettik sebet aldy. Solardyń qatarynda jeti balanyń anasy taldyqorǵandyq Janar Aitbaeva da bar. Jalǵyz basty ana qazir bala tárbiesimen úide otyr. Qosymsha tabys kózi joq. Sondyqtan oǵan memleketten kórsetilip jatqan árbir kómek mańyzdy.
«Buryn mundai kómek esh ýaqytta bolmaǵan. Buryn azdy-kópti posobiia alatynbyz. Oǵan da jetkizip júrdik. Qazir endi jaqsy bári. Tamaq-asymyzdy alyp jatyrmyz. GSP-myzdy alyp jatyrmyz. Áleýmettik paket deimiz. Onyń bárin alyp jatyrmyz. Jaqsy. Rahmet», - deidi Janar Aitbaeva.
Kópbalaly otbasyǵa «Biz birgemiz» aktsiiasy aiasynda erikti jastar da kómegin usynyp turady. Qazir ana mektep jasyndaǵy eki balasyn qashyqtan oqytyp, aýladaǵy shaǵyn baqshasyn rettep, úi sharýasymen ainalysýda. Jalǵyzbasty ana memleket tarapynan kórsetilip jatqan árbir kómek otbasynyń tótenshe jaǵdai men karantin rejiminen ońalyp shyǵýyna septigin tigizip jatqanyn aitady.
