Foto: ashyq derekkóz
Prezidenttiń 2024 jylǵy Joldaýynda aitylǵan tapsyrmalardy oryndaý úshin biylǵy sáýirde biznesti júrgizýdi retteitin zańnamaǵa ózgerister engizildi, dep habarlaidy Ult.kz.
Saýda jáne integratsiia ministri Arman Shaqqalievtyń aitýynsha, endi áleýmettik mańyzy bar taýarlardyń baǵasyn tikelei retteý toqtatylyp, ataýly áleýmettik qoldaýǵa basymdyq beriledi.
«Saýda ústemesiniń 15%-yn baqylaýdy kúsheitý maqsatynda shekti baǵalardy engizý tetigi alynyp tastaldy. Bul – naryqtaǵy ádil básekelestikti damytýǵa múmkindik beredi», – dedi ministr.
Qazirgi tańda elimizde «Tsifrlyq azyq-túlik vaýcheri» pilottyq jobasy iske qosylǵan. Ol muqtaj jandarǵa kómek kórsetýdi ádil ári maqsatty etýge, sondai-aq áleýmettik mańyzy bar taýarlardy deldalsyz, naqty satyp alý baǵasymen alýǵa jol ashady.
Ministrdiń sózinshe, Memleket basshysynyń barlyq tapsyrmalary erekshe baqylaýda.
«Árbir is-shara josparly túrde júzege asýda, mindetter sapaly jáne ýaqytyly oryndalady», – dep atap ótti Arman Shaqqaliev.
