Qazaqstan Respýblikasynyń Prezidenti janyndaǵy Jastar saiasaty jónindegi keńestiń kezekti otyrysy ótti, dep habarlaidy Aqordanyń baspasóz qyzmeti.
Otyrys barysynda Memlekettik keńesshi Erlan Qarin Keńeste mańyzdy qujattardyń biri – Jastar saiasatynyń jańa tujyrymdamasy ázirlenetinin atap ótti. Tujyrymdama jastar saiasaty baǵytyndaǵy negizgi qujatqa ainalady.
Tujyrymdamany ázirleý kezinde jyl saiynǵy «Jastar» ulttyq baiandamasynyń taldamalyq derekteri, táýelsiz áleýmettik zertteýler, saraptamalyq jáne qoǵamdyq pikirtalastar barysynda qalyptasqan usynystar men usynymdar paidalanylady.
Sonymen qatar Jastar saiasaty jónindegi keńeste jastar arasynda sintetikalyq esirtkiniń taralýyna qarsy is-qimyl máseleleri talqylandy.
Memleket basshysy óziniń ótken jylǵy «Halyq birligi jáne júieli reformalar – el órkendeýiniń berik negizi» atty Qazaqstan halqyna Joldaýynda «Esirtkiniń, onyń ishinde sintetikalyq esirtkiniń taralýy bolashaq urpaqtyń tamyryna balta shabady» dep atap ótti.
Talqylaýǵa Keńes músheleri, sondai-aq Ishki ister ministri Marat Ahmetjanov, Densaýlyq saqtaý ministri Ajar Ǵiniiat, «Sol» derekti filminiń rejisseri jáne prodiýseri Rinat Balǵabaev qatysyp, sintetikalyq esirtkiniń taralýyna qarsy kúres pen oǵan qarsy is-qimyl, nashaqorlyqtyń aldyn alý jáne emdeý máseleleri boiynsha júrgizilip jatqan jumystar týraly aityp berdi.
Sondai-aq Keńes otyrysyna salalyq ÚEU ókilderi men sarapshylar belsendi qatysyp, nashaqorlyqtyń aldyn alý boiynsha óz usynystaryn aitty.
Keńes otyrysynyń qorytyndysy boiynsha memlekettik organdar úshin aqparattyq-profilaktikalyq jumysqa jurtshylyqty belsendi tarta otyryp júzege asyrylatyn naqty usynymdar ázirlendi.
