Prezident jańadan bekitilgen Úkimetke halyqtyń kókeiinde júrgen máselelerdi sheshýge tapsyrma berdi. Bul týraly Ulttyq qoǵamdyq senim keńesi músheleriniń qatysýymen ótken jiynda Májilis depýtaty Berik Ábdiǵaliuly málim etti, dep habarlaidy QazAqparat.
«Memleket basshysy Májilistiń jalpy otyrysyndaǵy sózinde úlken saiasi mindetterdi qoidy. Ol - memlekettik tabystyń ádiletti bólinýi. Osy joly Prezident jańadan bekitilgen Úkimetke bul baǵytta jumysty jalǵastyrýǵa, halyqtyń kókeiinde júrgen máselelerdi sheshýge tapsyrma berdi. Bul óz kezeginde Úkimetke berilgen úlken senim jáne múmkindik», - dedi B. Ábdiǵaliuly.
Osy oraida depýtat bul baǵyttaǵy jumystar toqtap qalmaýy kerek ekenin, ony búkil qoǵam bolyp qoldaý mańyzdy bolyp otyrǵanyn atap ótti.
«Memleket basshysy ózekti máselelerdi kótergenin bilemiz. «Samuryq-Qazyna» qoryna qatysty biraz suraqtar boldy. Budan bólek, memlekettik kompaniialarda qanshama tiimsiz jumsalǵan qarajat bar. Munyń barlyǵy Prezidenttiń aitqan eskertýimen shektelmei, anyqtalǵan derekterdi qoǵamnyń talqylaýyna shyǵarý kerek. Sondyqtan bul baǵyttaǵy jumystarǵa jumylyp, Memleket basshysynyń bastamalaryn jalǵastyryp, onyń barlyǵynyń júzege asýyna yqpal etýimiz mańyzdy. Iaǵni kásipkerler men el halqy tiisti úlesin qosqany abzal. Bastamalarǵa qarsylyq tanytatyndar shyǵatyny belgili, óitkeni tosqaýyl jasap júrgen keibiri áli de qyzmette júr. Osy oraida qoǵamnyń qoldaýy kerek bolyp tur», - dedi ol.
«Prezident Májilistiń jalpy otyrysynda saiasi reformalar jaiynda aitty. Endi osy qalyptasqan ahýalǵa bailanysty taǵy da biraz usynystarymyzdy daiyndaimyz. Meniń oiymsha, Ulttyq qoǵamdyq senim keńesiniń otyrysynda alǵashqy usynystarymyzdy beremiz. Jalpy, qoǵamdyq baqylaýdy kúsheitý úshin arnaiy saiasi reformalardy ilgeriletý jumysyn jalǵastyramyz», - dedi B. Ábdiǵaliuly.
