Ulttyq qor qarajatyn tiimdi ári utymdy igerý kerek. Bul týraly respýblikalyq telearnalardyń efirinen elimizdegi tótenshe jaǵdaiǵa jáne memlekettiń daǵdarysqa qarsy is-sharalaryna bailanysty málimdemesinde Prezident Qasym-Jomart Toqaev aitty, dep habarlaidy "Ult aqparat".
Memleket basshysy búgingi málimdemesindegi sharalar paketin júzege asyrý úshin Úkimet pen Ulttyq bankke barlyq qajetti qarjy kózderin jumyldyrýdy tapsyrdy. Osy oraida Memlekettik áleýmettik saqtandyrý memlekettik qory, Ulttyq banktiń resýrstary men tetikteri qamtylmaq.
«Tuńǵysh Prezident-Elbasy qurǵan Ulttyq qor qarajatyn tiimdi ári utymdy igerý kerek. Qarjyny naqty ekonomikaǵa jedel jáne týra jetkizý úshin memlekettik damý institýttary arqyly tikelei qarjylandyrý múmkindigin eskerý kerek, iaǵni «Báiterek», «Agrarlyq nesie korporatsiiasy» jáne basqalary bar», - dedi Memleket basshysy.
Osy oraida Prezident atalǵan tetik basqa da jeńildiktermen qatar eksportqa baǵdarlanǵan qarqyndy ósip kele jatqan ortasha kompaniialarǵa kómekke baǵyttalýy qajettigin jetkizdi.
Qasym-Jomart Toqaev qarjylyq resýrstardyń kólemin, daǵdarysqa qarsy sharalardyń aýqymyn eskere otyryp, bólinetin qarjynyń maqsatty ári tiimdi jumsalýy airyqsha mańyzǵa ie bolatynyn qadap aitty.
«Bul mindet Esep komitetine júkteledi. Bul jumysqa óńirlik reviziialyq komissiialardy, qoǵamdyq keńesterdi jumyldyrý kerek. Sonymen birge, tótenshe jaǵdaidyń erekshe talaptaryn eskergen jón», - dedi Memleket basshysy.
Budan buryn habarlanǵandai, Memleket basshysy 42 500 teńge kólemindegi kómekti alatyn azamattar sanatynyń keńeitiletinin aitty.
