Búgin «Baiqońyr» ǵarysh ailaǵynda Iu.Gagarinniń ǵaryshqa alǵashqy ushýynyń 60 jyldyǵyna arnalǵan saltanatty májilis ótti, dep habarlaidy Memleket basshysynyń baspasóz hatshysy Berik Ýáli Facebook-tegi paraqshasynda.
Memleket basshysy Qasym-Jomart Kemeluly osy aitýly oqiǵaǵa bailanysty quttyqtaý joldady. Prezidenttiń quttyqtaý hatyn Úkimet basshysy Asqar Mamin oqyp berdi.
«Qurmetti ǵarysh salasy mamandary jáne ardagerler! Sizderdi alda kele jatqan kásibi merekelerińiz – Ǵaryshkerler kúnimen quttyqtaimyn!
60 jyl buryn adamzat tarihynda erekshe mańyzy bar aitýly oqiǵa boldy. Ǵarysh keńistigine janqiiarlyqpen túren salyndy. Keńes ǵaryshkeri Iýrii Alekseevich Gagarinniń kók júzine samǵap, aspan álemine alǵash jol ashýy búkil álemdik ǵylymnyń airyqsha serpinmen qaryshtap damýynyń jarqyn kórsetkishine ainaldy. Bul teńdessiz tarihi qadam bizdiń elimizde, Qazaqstannyń qasietti topyraǵynda jasaldy.
65 jyldan beri álemdegi eń iri ǵarysh ailaǵy bolyp sanalatyn «Baiqońyrdan» osy ýaqytqa deiin 150 ǵaryshker kókke kóterilip, ǵalamnyń sheksiz keńistigin baǵyndyryp qaitty. Olardyń qatarynda qazaq ǵaryshkerleri Toqtar Áýbákirov, Talǵat Musabaev jáne Aidyn Aiymbetov bar» delingen quttyqtaýda.
Odan bólek, quttyqtaý mátininde Prezident ǵarysh salasynyń mamandary men ardagerlerine alǵys bildirgen.
«Ǵalymdar men konstrýktorlardyń, synaqshylar men injenerlerdiń eren eńbegisiz ǵaryshty igerý múmkin emes. Osyǵan orai, ǵarysh salasynyń mamandary men ardagerlerine shynaiy rizashylyǵymdy bildiremin. Sizderdiń kásibi biliktilikterińiz ben adal eńbekterińizdiń arqasynda zamanaýi ǵarysh salasy búgingi tańda laiyqty damyp keledi.
Qazaqstan men Reseidiń belsendi ári jemisti yntymaqtastyǵy ǵaryshty zertteý jáne ǵaryshqa ushý salasyndaǵy birlesken jobalar men baǵdarlamalardy júzege asyrýǵa múmkindik beretinine senimim mol» dep jazǵan Memleket basshysy.
Sóz sońynda Qasym-Jomart Toqaev saltanatty jiynǵa qatysýshylarǵa zor densaýlyq, baq-bereke jáne jańa tabystar tiledi.
