Qazaqstan Prezidenti Qasym-Jomart Toqaev shyǵarmashylyq bastamalardy qoldaý maqsatynda Mádeniet qoryn ashý týraly tapsyrma bergenin málimdedi, dep habarlaidy "Ult aqparat".
«Volonterler elimizdiń rýhani áleýetin arttyrýǵa úles qosýy tiis. Mádenietimizdi damytpai, ósip-órkendeý múmkin emes. Sondyqtan osy máselege erekshe mán berýimiz qajet. Qazirgi tańda mádeniet jáne óner salasynda jas talanttardyń arqasynda Qazaqstan kúlli álemge tanylyp keledi. Biz osy baǵytta júieli jumys júrgizýimiz kerek. Iaǵni oiy ushqyr ári daryndy azamattardy barynsha qoldaý qajet. Sonda ǵana tól mádenietimizdi jańa beleske kóteretin býyn qalyptasady», - dedi Memleket basshysy elordadaǵy «Birgemiz» respýblikalyq front-keńsesiniń ashylý saltanatynda.
Prezident shyǵarmashylyq bastamalardy qoldaý maqsatynda Mádeniet qoryn ashý týraly tapsyrma bergenin aityp ótti.
«Bul qurylym – shyǵarmashylyq odaqtarǵa, áleýetti jobalarǵa qarjylyq jáne basqa da baǵyttaǵy kómekterdi beredi. Qordyń jumysyna volonterlerdi de tartý qajet. Olar mýzei, kitaphana, óner mekemelerinde ózderiniń jobalaryn júzege asyra alady. Osy sharalar elimizdiń shyǵarmashylyq áleýetin nyǵaitýǵa mol múmkindik beredi», - dedi ol.
Aita ketsek, Prezident Qasym-Jomart Toqaev elordada EKSPO kórmesiniń «Art Hub» pavilonynda ornalasqan volonterlerdiń «Birgemiz» respýblikalyq front-keńsesiniń ashylý saltanatyna qatysty. Front-keńse búkil Qazaqstannyń volonterleri úshin keńes berý, ádistemelik, oqytý jáne aqparattyq ortalyqqa ainalatyn bolady.
Sondai-aq, ol volonterlik jobalar men oqytý baǵdarlamalaryn úilestirý, monitoring jasaý, volonterlikti ilgeriletý boiynsha biryńǵai aqparattyq saiasatty júrgizedi jáne biryńǵai Call-ortalyqtyń jumysyn uiymdastyrady.
