Qazaqstanda jas ǵalymdarǵa qandai jaǵdai jasalǵan. Ǵylymǵa qyzyǵýshy mamandardyń qandai múmkindikteri bar? Osy jáne ózge de otandyq ǵalymdar taqyrybyna arnalǵan suraqtarǵa QR Bilim jáne ǵylym ministrligi Ǵylym komitetiniń tóraǵasy Janna Qurmanǵalieva jaýap berdi, dep habarlaidy QazAqparat.
«Byltyr Memleket basshysy Joldaýynda jas ǵalymdarǵa arnalǵan jylyna kem degende 1 myń oqý grantyn bólýdi tapsyrdy. Osy oraida biyldan bastap PhD ǵalymdarǵa 3 jyldyq ǵylym granty qarastyrylyp otyr. Jalpy granttyń quny 24 mln teńge iaǵni jas ǵalymǵa jylyna 8 mln teńge bólinedi. Jáne 1 myń AQSh dollary kóleminde stipendiia tólenbek. Grantty utyp alýdyń eki sharty bar. Birinshiden, jas ǵalymnyń ǵylymi jetekshisi bolý kerek. Ekinshiden, úmitkerdiń sheteldik ǵylymi konsýltanty bolýy tiis. Eń bastysy ǵylymmen ainalysamyn, qazaqstandyq ǵylymǵa úlesimdi qosamyn degen talpynysy bolǵany jón. Odan bólek, óziniń ǵylymi taqyryby, ideiasy bolǵany abzal», - dedi Janna Qurmanǵalieva OKQ-de ótken baspasóz máslihatynda.
Onyń aitýynsha, sońǵy ýaqytta otandyq jas ǵalymdarǵa erekshe nazar aýdarylyp jatyr.
«Búginde jas ǵalymdardyń qatysýymen elimizde 315 ǵylymi joba iske asyrylyp jatyr, ol úshin 17,8 mlrd teńge qarastyrylǵan. Prezidenttiń taǵy bir tapsyrmasy otandyq ǵalymdardyń shetelden taǵylymdamadan ótýi. Tapsyrmaǵa sai jyl saiyn 500 qazaqstandyq ǵalym sheteldiń tanymal oqý oryndarynan taǵylymdamadan ótýi tiis. Búginde «Bolashaq» baǵdarlamasy arqyly 49 otandyq jas ǵalym shetelden taǵylymdamadan ótý múmkindigine ie bolyp otyr. Sol úrdis jyl sońyna deiin jalǵasyn tabady. Osylaisha jas ǵalymdarymyzdyń álemniń kez-kelgen jerinde ozyq tájiribe alyp, ǵylymmen ainalysýǵa múmkindigi bar», - deidi ol.
Sondai-aq, komitet basshysy biyl 28 qazanda qazaqstandyq ǵalymdardyń shetelden taǵylymdamadan ótýine arnalǵan baiqaý ótetinin tilge tiek etti.
Buǵan deiin habarlaǵanymyzdai, elimizde 2025 jyly ǵalymdardyń sany 1,5 esege kóbeietini aityldy.
