Prezidenttiń baspasóz hatshysy Berik Ýáli Facebook-tegi paraqshasyna Qasym-Jomart Toqaevtyń Ulttyq keńes alańynda aitqan tapsyrmalarynyń taǵy bir parasy iske asqanyn jazdy, dep habarlaidy "Ult aqparat".
Memleket basshysynyń baspasóz hatshysy Ulttyq qoǵamdyq senim keńesiniń 3-otyrysynda pedagog mamandyǵyna oqityn stýdentterdiń shákirtaqysyn kóterý týraly tapsyrma berilgenin eske saldy.
«Pedagogika mamandyqtaryna túsýge qoiylatyn talaptardy kezeń-kezeńimen arttyrý qajet. Mamandyqtyń bedelin biiktetý maqsatynda bolashaq ustazdardyń shákirtaqysyn 26 myńnan 42 myń teńgege deiin kóterý kerek», - degen bolatyn Qasym-Jomart Toqaev.
Jazbada pedagog mártebesin kóterý baǵytynda atqarylǵan ózge de igi ister týraly málimet berilgen. Atap aitsaq, pedagogikalyq baǵyt boiynsha oqýǵa túsý úshin UBT-nyń shekti baly 60-tan 70-ke kóterilgeni, shákirtaqyny arttyrý úshin 2020-2023 jyldarǵa respýblikalyq biýdjetten 17,6 mlrd teńge bólingeni, doktoranttardyń shákirtaqysy 104 498 teńgeden 150 myń teńgege artqany naqty kórsetilgen.
