«QazAvtoJol» ulttyq kompaniiasynyń BQO-daǵy filialynyń direktory Qazbek Mámbetov óńirde jol salý jumysy qalai júrip jatqany týraly málimet berdi, dep habarlaidy QazAqparat.
Biyl kóktemde Memleket basshysy uzaq jyldar boiy sheshilmei kele jatqan Batys Qazaqstan oblysyndaǵy kúre joldar problemasy boiynsha Úkimetke jáne aimaq basshysyna tapsyrmalar júktedi. Qazir atalǵan óńirde jol salý jáne jóndeý boiynsha qyzý jumys júrip jatyr. Osy oraida jumystyń barysy týraly «QazAvtoJol» ulttyq kompaniiasynyń BQO-daǵy filialynyń direktory Qazbek Mámbetov aityp berdi.
«Biz qazir Qaztalov aýdany aýmaǵyndaǵy tasjolda turmyz. Iaǵni bul jol «Qaztalov – Jánibek odan ári Resei shekarasyna deiin jalǵasady. Bul jerde kúrdeli jóndeý jumysy júrip jatyr. Ol degenimiz joldyń negizin qalap, beton men asfalt tóselip jatyr. Biz turǵan ýchaskede 13 shaqyrym jolǵa asfalt tóseldi. Jalpy atalǵan baǵyt boiynsha 80 shaqyrym jol asfalttaldy. Joldy jergilikti merdiger kompaniialar salyp jatyr, jumysshylar da ózimizdiki», - dedi Qazbek Mámbetov baspasóz týry barysynda.
Filial basshysy aityp otyrǵan «Qaztalov – Jánibek - Resei shekarasyna deiin tasjol 3-i sanatqa jatady. Ol jerde shamamen 700 adam 500-ge jýyq tehnikanyń kómegimen eńbektenip jatyr.
«Jol qurylysy materialdaryn jetkizýdiń 2 joly bar. Biri Aqtóbeden shyǵyp Atyraý oblysyn ainalyp Resei jaq arqyly jetkiziledi. Ekinshi joly Oral aýmaǵy arqyly jetkizý múmkindigi bar. Sonymen qatar keibir materialdar Reseiden ákelinedi. Búginde materialdar jetkizý máselesin sheship, jedeldetý úshin Qazaqstan temir joly kompaniiasymen kelisimge kelim jatyrmyz. Jol salý jumystaryna 8 myń vagon material jetkizilýi tiis. Qazirgi ýaqytta 1,5 myń vagon material jetkizildi. Qalǵan materialdar da ýaqytyly keledi dep oilaimyz. Odan bólek, qazir «Ónege – Bisen – Saiqyn» baǵyty boiynsha 103 shaqyrym jolǵa kúrdeli jóndeý jumysy júrýde», - deidi ol.
Atalǵan jol ýchaskesi BQO-nyń Qaztalov, Jánibek jáne Bókei ordasy aýdanynyń aýmaǵyn jalǵastyryp jatyr.
«Qazir bul joldaǵy kólik qatynasynyń qarqyny joǵary emes. Jol salynyp bitken soń kólik qarqyny ósedi dep kútilýde. Jalpy BQO boiynsha respýblikalyq mańyzy bar tasjoldyń uzyndyǵy 1414 shaqyrymdy quraidy. Biyl respýblikalyq biýdjetten jol salý jáne jóndeý jumysyna 15 mlrd teńge bólindi», - dedi Mámbetov.
Buǵan deiin oblystyq QazAvtoJol basshysy BQO-daǵy tasjoldardyń 62%-iniń jaǵdaiy qanaǵattanarlyq dep málimdegen edi.
