Qasym-Jomart Toqaevqa vedomstvo jumysynyń qorytyndylary men Memleket basshysynyń buǵan deiin bergen tapsyrmalarynyń oryndalý barysy týraly esep berildi, dep habarlaidy Aqorda.
Prezident Sybailas jemqorlyqqa qarsy is-qimyl agenttiginiń tóraǵasyna memlekettik organdar men basqa da uiymdardyń sybailas jemqorlyqqa qarsy is-qimyldaryn úilestirý jónindegi jumystardy kúsheitýdi tapsyrdy.
Bul rette Prezident ózderiniń qaramaǵyndaǵy qurylymdarda sybailas jemqorlyq kórinisteriniń aldyn alý úshin tiisti sharalar qabyldamaityn basshylarǵa yqpal etýdiń pármendi tetikterin zańnamalyq turǵydan bekitý kerek ekenin atap ótti.
Qasym-Jomart Toqaevtyń tapsyrmasy boiynsha sybailas jemqorlyqqa qarsy is-qimyl turǵysynan ministrler men ákimder qyzmetiniń tiimdiligin baǵalaýdyń naqty talaptary ázirlenedi. Bul máselede enjarlyq tanytqan basshylar jaýapqa tartylady.
Memleket basshysy biýdjet qarjysyn jumsaýdyń ashyqtyǵyn odan ári arttyrýdyń mańyzdylyǵyn atap ótip, sybailastyqtyń aldyn alý sharalaryna basymdyq berý týraly aitty.
Sondai-aq qylmystyq jolmen alynǵan qarajat pen aktivterdi izdestirýge jáne qaitarýǵa basymdyq bere otyryp, sybailas jemqorlyqqa jatatyn qylmystar jasaǵany úshin jazanyń bultartpas qaǵidatyn múltiksiz saqtaý qajet ekenine nazar aýdardy.
