Prezident Qasym-Jomart Toqaevtyń tóraǵalyǵymen beinebailanys rejiminde shuǵyl áreket etý shtabynyń kezekti otyrysy ótti. Jiyn barysynda Bas prokýror, Ulttyq qaýipsizdik komitetiniń tóraǵasy, Ishki ister jáne Qorǵanys ministrleriniń mindetin atqarýshy tulǵalar baiandama jasady, - dep habarlaidy "Ult aqparat" Aqorda saityna silteme jasap.
Bas prokýror Qasym-Jomart Toqaevqa tótenshe jaǵdai rejimin buzǵan 2161 adamnyń ákimshilik jaýapkershilikke tartylǵany týraly málimet berdi. Onyń aitýynsha, lańkestikke qarsy is-qimyldar bastalǵan kúnnen bastap elimizde 412 qylmystyq is, sonyń ishinde terrorlyq aktiler men kisi óltirý boiynsha sotqa deiingi tergeý amaldary bastalǵan. Prokýratýra organdary Básekelestikti qorǵaý jáne damytý agenttigimen birlesip, suiytylǵan gaz óndiretin sýbektilerdiń baǵa boiynsha ymyralasý derekterin tekserýdi jalǵastyryp jatyr.
Ishki ister ministrligi tarapynan Prezidentke Almaty qalasynda, Almaty, Jambyl, Qyzylorda jáne basqa da oblystarda terroristik toptardy joiý men qylmyskerlerdi ustaý boiynsha arnaiy operatsiiany jalǵastyrý týraly esep berildi. Kisi óltirý, bilik ókilderine qatysty zorlyq-zombylyq, buzaqylyq, memlekettik organdardyń ǵimarattaryna shabýyl jasaý faktileri boiynsha barlyǵy 388 qylmystyq is qozǵaldy. Dáleldemeler bazasyn jinaý jáne tirkeý, oqiǵalar hronologiiasyn qalpyna keltirý boiynsha jedel is-sharalar júrgizilip jatqany aityldy.
Qarýly Kúshter terrorizmge qarsy operatsiiany júrgizýde UQK men IIM-ge kómek kórsetip jatyr. Ótken táýlikte 11 eldi mekendegi blokbeketterde áskeri qyzmetshiler 38 adamdy ustady. Olardyń 23-nen atys jáne sýyq qarýlar tabyldy. UQK Shekara qyzmetimen birlesip, áskeri aviatsiianyń qoldaýymen taýly jerlerde barlaý-izdestirý is-qimyldary júrgizilýde. Áskeri qyzmetshilerdiń jumysy 25 eldi mekendegi 105 blokbekette jalǵasyp jatyr.
Ulttyq qaýipsizdik komitetiniń málimetine qaraǵanda elimizdegi jaǵdai turaqtalyp keledi. Asa qaýipti destrýktivti is-qimyl tirkelgen joq. "Kibershit" júiesi shtattyq rejimde jumys istep tur.
Jiyn sońynda Prezident qoǵamdyq tártip pen eldegi qaýipsizdikti qalpyna keltirýdi qarqyndy jalǵastyrýdy tapsyrdy.
