«Samuryq-Qazyna» qorynda reformalaý múldem múmkin bolmasa, ondai qurylymnyń ekonomikamyzda bolmaǵany jón. Búgin Parlament Májilisiniń jalpy otyrysynda Memleket basshysy Qasym-Jomart Toqaev osylai málim etti, dep habarlaidy QazAqparat.
«Samuryq-Qazyna» qory qyzmetiniń tiimdiligi máselesine toqtalǵan Prezident búginde bul qordyń aktivi elimizdiń ishki jalpy óniminiń 60 paiyzyna jýyqtaitynyn aitty.
Iaǵni, osy uiymnyń tiimdi qyzmeti búkil ekonomikamyzdy órkendetýge tikelei áser etedi. Qordyń KEGOC, Qazaqgaz jáne Qazaqstan temir joly siiaqty infraqurylymdyq kompaniialary ekonomikamyzdyń barlyq derlik sektorynyń tiimdiligin aiqyndaidy. Osy tusta, qor óziniń negizgi mindetin oryndap otyr ma, iaǵni ulttyq bailyqty eselei aldy ma degen oryndy suraq týyndaidy. Qomaqty jalaqy alatyn qyzmetkerleri, direktorlar keńesi nemen ainalysady? Qyzmeti óte qymbat konsalting kompaniialaryn jáne sheteldik mamandardy jumysqa tartqannan paida bar ma?», - dedi Memleket basshysy.
Osy oraida Qasym-Jomart Toqaev atalǵan qorǵa qatysty Úkimetke tiisti tapsyrma berdi.
«Samuryq-Qazyna» qory elimizdiń strategiialyq aktivterin basqarý isinde basty ról atqarady. Sondyqtan Úkimetke Strategiialyq josparlaý jáne reformalar agenttigimen birlesip, kvazimemlekettik sektordy túbegeili reformalaý úshin usynystar ázirleýdi tapsyramyn. Eger Qordy reformalaý múldem múmkin bolmasa, ondai qurylymnyń ekonomikamyzda bolmaǵany jón», - dedi Prezident.
