Foto: Aqorda
Prezident Ortalyq Aziia memleketteri basshylary men Germaniia Federaldyq kantsleriniń kezdesýi barysynda ortaq múddelerge den qoia otyryp, birlesken jumystyń negizgi baǵyttaryna toqtaldy. Bul týraly Aqordanyń baspasóz qyzmeti habarlady.
"Birinshi – taýar ainalymyn ulǵaitý. Birlesken óńirlik jobalardy tiimdi iske asyrý esebinen saýda kórsetkishin arttyrý, taýarlar nomenklatýrasyn keńeitý – mańyzdy mindet. Máselen, Qazaqstan Germaniiaǵa somasy 850 million dollardy quraityn taýardyń 100 túri boiynsha eksport kólemin ulǵaitýǵa daiyn", – dedi Memleket basshysy.
Prezident energetikalyq saladaǵy yntymaqtastyqty keńeitýdi kelesi basymdyq retinde atady.
"Germaniiaǵa energetikalyq resýrstardyń senimdi ári iri jetkizýshileriniń biri retinde Qazaqstan nemis naryǵyna munai eksportyn arttyrýǵa ázir. Kómirsýtegin uzaqmerzimdi jáne turaqty jetkizýdi qamtamasyz etýde germaniialyq seriktesterimizdiń qoldaýyna aldaǵy ýaqytta da súienemiz. Elderimizdiń ornyqty damýy úshin energiianyń balamaly kózderine aýysýdaǵy birlesken qyzmetimizdi jandandyra túsý mańyzdy dep sanaimyn. Sýtekti energetika salasynda ózara tiimdi yntymaqtastyq ornatýǵa daiynbyz. Elimiz Ózbekstanmen jáne Ázerbaijanmen Kaspii teńiziniń tabany arqyly Eýropa elderine qarai «jasyl» energetikany jetkizý jelisin salý jobasyn pysyqtap jatyr. Germaniialyq seriktesterge osy strategiialyq jobaǵa qatysý múmkindigin qarastyrýdy usynamyz", – dedi Qasym-Jomart Toqaev.
Memleket basshysy ónerkásiptik kooperatsiiany damytýdy, onyń ishinde Germaniiaǵa asa mańyzdy materialdardy jetkizý kólemin ulǵaitýdy basty baǵyttyń biri dep sanaidy.
"Qazaqstan Germaniia kompaniialaryn sirek kezdesetin metaldardy geologiialyq barlaý jáne igerý jumystaryn birge júrgizýge shaqyrady. Óńirdegi kendi bastapqy jáne qaita óńdei otyryp, «shikizatty tehnologiiaǵa aiyrbastaý» qaǵidaty boiynsha seriktestik ornatýdy usynamyz. Bul oraida HMS Bergbau kompaniiasynyń Shyǵys Qazaqstan oblysynda litiidi igerý jáne óńdeý boiynsha investitsiialyq jobany iske asyrýyn quptaimyz. Onyń quny 500 million dollardan asady. Biz elimizdiń aýmaǵynda baǵaly jáne tústi metaldardyń ken ornyn barlap, igerý úshin germaniialyq investorlarǵa qolaily jaǵdai jasaýǵa daiynbyz. Eýropalyq seriktesterimizdiń qoldaýymen Qazaqstannyń Tehnologiialyq boljaý ortalyǵy bazasynan Sirek kezdesetin metaldar boiynsha óńirlik zertteý ortalyǵyn qurǵan jón dep sanaimyz", – dedi Qazaqstan Prezidenti.
Budan bólek, kólik-logistika salasyndaǵy bailanysty nyǵaitý máselesine de basa nazar aýdaryldy.
«Orta dálizdi» odan ári damytýdyń investitsiialyq turǵydan perspektivasy zor. Atap aitqanda, Kaspii teńizindegi porttardy jańǵyrtý jáne tsifrlandyrý, júk terminaldaryn salý isinde mol múmkindik bar. Ortalyq Aziia men Eýropanyń kólik-logistika júiesin odan ári integratsiialaý mańyzdy mindet bolyp qala beredi. Qazaqstan Global Gateway baǵdarlamasy aiasynda «Orta dálizdi» damytý úshin eýropalyq seriktesterdiń 10 milliard eýro bólý týraly sheshimin quptaidy. Osy baǵytty Transeýropalyq kólik jelisimen jáne Global Gateway strategiiasymen ushtastyrýda Germaniia tarapy qoldaý kórsetedi dep senemiz", – dedi Memleket basshysy.
