Memleket basshysy Qasym-Jomart Toqaev Májilis otyrysynda elordadaǵy LRT qurylysy týraly pikir bildirdi, dep habarlaidy QazAqparat.
«Kópshilikti, ásirese elorda turǵyndaryn ashýlandyratyn taǵy bir másele – LRT qurylysy bolyp otyr. Ol kádimgi infraqurylymdyq jobadan eldiń abyroi-bedeline nuqsan keltiretin kúrdeli problemaǵa ainaldy. Qazirdiń ózinde orasan zor qarajat jumsaldy, qaryzdar tartyldy, sheteldik áriptester aldynda aýqymdy kelisimsharttyq mindettemeler qabyldandy. Bul joba bastapqyda-aq úlken qatelik boldy, ony moiyndaý kerek. Sonymen qatar, bul sybailas jemqorlyqtyń iisi múńkip turǵan joba», - dedi Toqaev.
Memleket basshysy endi ońtaily sheshim qabyldaý qajettigin aitty.
«Sebebi ony jai ǵana buza salý ýaqyt pen aqshany joǵaltýdy bildiredi. Demek, otandyq jáne sheteldik sáýletshiler men ýrbanisterdi shaqyryp, jobany iske asyrýdyń yqtimal nusqalaryn anyqtaýdan basqa jol joq», - dedi Prezident.
