QR Prezidenti Qasym-Jomart Toqaev Parlament Májilisiniń jalpy otyrysynda memlekettik basqarý salasynda keshendi reforma kerektigin alǵa tartty, dep habarlaidy QazAqparat.
«Memlekettik basqarý salasyna da keshendi reforma kerek. Atalǵan salaǵa tán birneshe problema bar. Ol kadrlyq potentsialdyń tómendigi, jemqorlyq, formaldylyq jáne kadr tapshylyǵy men turaqtamaýy. Sondyqtan da halyqtyń memlekettik basqarý men bilikke degen senimi tómen. Osy oraida memlekettik qyzmetke alý talabyn jetildirý qajet. Qyzmetke alý talabynyń artyq, kerek emes tustaryn alyp tastaý kerek jáne memlekettik qyzmetke kelgisi keletinder úshin esh kedergi bolmaýy tiis», – dedi Qasym-Jomart Toqaev Májilis otyrysynda.
Memleket basshysynyń aitýynsha, memlekettik qyzmetke irikteý ádil ári joǵary deńgeide ótýi tiis.
«Elge qyzmet etemin degen kez kelgen qazaqstandyq úshin memlekettik qyzmet ashyq bolǵany jón. Sondai-aq, memlekettik qyzmetten ketý protsesin de qaita qaraý kerek. Óitkeni, keibir sheneýnikter kabinetinde jyldaryn ótkizedi. Olar jas mamandardyń órkendeýine jol bermei, memlekettik apparattyń tiimdiligin tómendete túsýge áserin tigizýde. Ondai sheneýniktermen qoshtasý kerek. Degenmen memlekettik basqarý salasynda sheneýniktiń institýtsionaldyq jady da mańyzdy. Iaǵni bir kúnge búkil sheneýnikti alyp tastap, olardy jastarǵa aýystyrý da jón emes. Bul jerde salmaqty sheshim qajet. Eger 60 jastaǵy sheneýnik óz qyzmetin oidaǵydai atqaryp, memleketke paidasyn tigizip otyrsa ondai mamanǵa tiispeý kerek», - deidi ol.
Sondai-aq, Prezident Úkimet pen memlekettik qyzmet jónindegi agenttikke memlekettik basqarýdyń jańa mehanizmin ázirleýdi tapsyrdy.
