Memleket basshysy Kaspii qubyry konsortsiýmynyń 25 jyldyǵyna arnalǵan saltanatty jiynǵa qatysty, dep habarlaidy "Ult aqparat" Aqordanyń baspasóz qyzmetine silteme jasap.
Prezident Qasym-Jomart Toqaev jiynǵa qatysýshylardy Kaspii qubyry konsortsiýmynyń 25 jyldyǵymen quttyqtap, munai-gaz sektory Qazaqstan ekonomikasynyń ósý qarqynyn aiqyndaityn basty salanyń biri ekenin atap ótti.
– Bul salany damytý úshin shetelden aýqymdy investitsiia tartylyp, ozyq tehnologiia engizildi. Bizdiń elimiz álemdegi eń iri munai eksporttaýshy memleketterdiń qatarynda. Qazir jylyna 90 million tonnaǵa deiin munai óndiremiz. Ónimdi syrtqa shyǵaratyn Kaspii qubyr jelisiniń salynýy munai-gaz sektoryn damytýǵa airyqsha yqpal etti, – dedi Memleket basshysy.
Prezident jobanyń iske asyrylýy álemdik ólshem boiynsha Teńiz, Qarashyǵanaq jáne Qashaǵan siiaqty iri ken oryndaryn igerýge tyń serpin bergenin aitty. Qazirgi tańda elimizde óndiriletin munaidyń 60 paiyzy osy ken oryndaryna tiesili.
– Konsortsiým Qazaqstan men Reseidiń, sondai-aq «Shevron», «ENI», «Lýkoil», «Shell» jáne basqa da jetekshi munai kompaniialarynyń qatysýymen halyqaralyq iri munai tasymaldaý jobasyna ainaldy. Barlyq qatysýshy kompaniialardyń arasynda mámilege qol jetkizý úshin Qazaqstan men Resei basshylarynyń úlken kúsh-jigerin qajet etken ári uzaq jyldar boiy júrgizilgen kelissózder áli esimizde. Tuńǵysh Prezident Nursultan Nazarbaev usynǵan seriktestiktiń 10 qaǵidasy Konsortsiýmnyń tabysty qyzmet etýine negiz boldy. Bul jobanyń men úshin máni zor, sebebi onyń qurylysyna jáne iske qosylýyna arnaiy qatysqan edim, – dedi Qasym-Jomart Toqaev.
Memleket basshysynyń aitýynsha, búgin Kaspii qubyry konsortsiýmy – barlyq aktsionerdiń júieli ári tiimdi jumysynyń úlgisi. 2001 jyldan beri KQK-niń munai qubyry arqyly álemdik naryqtarǵa 750 million tonnadan astam Qazaqstan munaiy eksporttaldy. Onyń ótkizý qabileti shamamen 2,5 ese artyp, jylyna 67 million tonnaǵa deiin jetti. Prezidenttiń aitýynsha, 2023 jylǵa qarai bul kórsetkishti 80 million tonnaǵa deiin jetkizý josparlanyp otyr.
– Byltyr Kaspii qubyry konsortsiýmy aktsionerlerdiń barlyq qaryzyn ótep, óziniń qarjy turaqtylyǵyn dáleldei aldy. Jalpy Konsortsiým – Qazaqstannyń munai-gaz kesheniniń negizgi bóligi. Elimizdiń ekonomikalyq damýyna jáne azamattarymyzdyń ál-aýqatyn qamtamasyz etýge eleýli úles qosyp otyr. Kaspii qubyry konsortsiýmyn megajoba dep aitsam artyq emes. Onyń bolashaǵy zor ekenine senimdimin, – dedi Prezident.
Qasym-Jomart Toqaev Kaspii qubyry konsortsiýmynyń shirek ǵasyrlyq mereitoiy Qazaqstan Táýelsizdiginiń 30 jyldyǵymen tuspa-tus kelýiniń simvoldyq máni bar ekenin aitty.
– Konsortsiým sheteldik investorlarmen uzaq merzimdi yntymaqtastyǵymyzdyń simvolyna ainaldy. Jobany Qazaqstan men Resei birlese júzege asyrdy. Sonyń arqasynda eki eldiń munai tasymaly salasyndaǵy seriktestigi nyǵaia tústi, – dedi Memleket basshysy.
Prezident Konsortsiýmnyń eńbek ujymy qubyrdyń turaqty jumysyn qamtamasyz etýge zor úles qosqanyn atap ótti. Memleket basshysy Kaspii qubyry konsortsiýmynyń ujymyna, ardagerlerine jáne aktsionerlerine rizashylyǵyn bildirip, amandyq pen tabys tiledi.
Jiyn barysynda Kaspii qubyry konsortsiýmynyń birqatar ardagerleri men qyzmetkerleri memlekettik nagradalarmen marapattaldy. Qasym-Jomart Toqaev nagradalardy óz qolymen tabystady.
Is-shara barysynda Resei Federatsiiasy Úkimeti tóraǵasynyń orynbasary Aleksandr Novak, «Shevron» kompaniiasynyń Eýraziia-Tynyq muhity aimaǵynda munai barlaý jáne óndirý jónindegi prezidenti Naidjel Hirn, «Lýkoil» JAQ prezidenti Vagit Alekperov jáne «Transneft» kompaniiasynyń birinshi vitse-prezidenti Maksim Grishanin sóz sóiledi.
