Elorda ákimi Altai Kólginov volonterler men qalanyń belsendi turǵyndaryna «Halyq Alǵysy» medaldaryn tabys etti, dep habarlaidy "Ult aqparat".
«Qala turǵyndary pandemiia kezinde uiymshyldyq tanytty, jaqyndaryna kómektesip, Covid-19-diń taralmaýyna ózderiniń úlesin qosty. Eriktiler baqylaý-ótkizý beketterinde kezekshilik atqardy, dezinfektsiia jasaýǵa qatysty, jedel shtabta da jumys istedi. Azamattarymyzdyń turmysy tómen sanattaryna dári-dármek, azyq-túlik pen qorǵanýǵa arnalǵan zattardy taratty. Birlesken eńbektiń arqasynda jaǵdaidy turaqtandyra aldyq.
Memleket basshysy qaiyrymdylyq, volonterlik uiymdar jáne biznes salasy ókilderimen onlain kezdesýde qaiyrymdylyq pen volonterlik pandemiia kezinde jalpyulttyq deńgeige jetip, áleýmettik normaǵa ainala bastaǵanyn aitty. Prezident volonterlik qyzmetti damytý, qaiyrymdylyq jáne metsenattyqty qoldaý – memlekettiń uzaq merzimdi basymdyǵy ekenin atap ótti», - dep jazdy A.Kólginov Instagram-da.
Qala basshysy atap ótkendei, Elbasy bastamasy boiynsha qurylǵan «Biz birgemiz» qory myńdaǵan otbasyǵa qarjylai kómek kórsetti, elordalyqtar joǵary áleýmettik jaýapkershilik tanytty.
«Kezdesýde quramyna volonterlik uiymdar men qozǵalystardyń barlyq ókili kiretin biryńǵai platforma qurý máselesin talqyladyq. Bul eshkim shet qalmas úshin muqtaj adamdarǵa jeke-jeke kómek kórsetýge múmkindik beredi. Buǵan qosa bólingen kómektiń ashyqtyǵy qamtamasyz etiledi. Sondai-aq volonterlik uiymdardy damytý jáne qoldaýdyń birqatar baǵyty jaily sóz qozǵadyq.
Búgin Prezident atynan belsendi eriktiler men azamattarǵa «Halyq Alǵysy» medalin tabystadym. Osyndai qiyn kezeńde aianbai eńbek etip, ózara járdemdeskenderińiz úshin alǵys aitamyz», - dedi Altai Kólginov.
