Astanada Qazaqstan Prezidenti Nursultan Nazarbaevtyń qatysýymen Úkimettiń keńeitilgen otyrysy ótti. Búgingi jiynda ótken jylǵy jumys qorytyndylanyp, aldaǵy jylǵa josparlar bekitildi. Elbasy otyrysta kezekti ret otandyq kiim-keshek máselesin kóterdi.
«Bizde barlyǵy shetelden ákelinedi. Jaraidy, bizde sánqoi qyzdar men jigitter bar, olarǵa «Shanel-manel» men basqalary kerek. Al qarapaiym halyqqa she? Keshe jastarmen kezdesý kezinde, Jastar jylynyń ashylýyndaǵy kórmede maǵan tamasha kostiýmder men aiaq kiimdi kórsetti. Biz olarǵa kóp nazar aýdarmaimyz. Erbolat, (premer orynbasary Dosaev-avtor eskertpesi) nelikten nege eshkim damytpaidy? Sen osymen múlde ainalyspaisyń», - dedi Nazarbaev.
Úkimet basshysynyń orynbasary 600 milliard teńge import almastyrýǵa baǵyttaldy dep jaýap berdi.
Memleket basshysy birinshi kezekte óz ónimderimizdi nasihattalý kerektigin jetkizdi.
«Osynda otyrǵan barlyǵymyz otandyq kostiýmdermen kelýimiz kerek. Bunda turǵan eshteńe joq. Álemde qarapaiym kiim degen bar, memlekettik qyzmetkerlerge arnalǵan qarapaiym kiim bar. Biz osylaisha otandyq jeńil ónerkásipti damytamyz», - dedi Nursultan Nazarbaev.
Prezident jas kásipkerlerge jol ashý kerektigin de aitty.
«Áitpese, biz bazar izdep, óz ishki naryǵymyzdy paidalanbai otyrmyz» dep túiindedi Elbasy.
