Foto: Akorda.kz
Memleket basshysy Qasym-Jomart Toqaev Mańǵystaý, Túrkistan, Soltústik Qazaqstan jáne Qaraǵandy oblystarynyń ákimderin qabyldady, dep habarlaidy "Ult aqparat" Aqordanyń resmi saityna silteme jasap.
Prezidentke oblystardyń ákimderi óńirlerdiń byltyrǵy áleýmettik-ekonomikalyq damý kórsetkishteri jáne aldaǵy kezeńge arnalǵan jospary jóninde baiandady.
Mańǵystaý oblysynyń ákimi Nurlan Noǵaevtyń málimetine sáikes ótken jyly Mańǵystaý oblysynda quny 25 milliard teńgeni quraityn 15 investitsiialyq joba júzege asyrylǵan. Óńir ekonomikasyna tartylǵan investitsiia kólemi 15,8 paiyzǵa artyp, 762 milliard teńgege jetken. Shaǵyn jáne orta biznes sýbektileriniń sany 75,3 myń birlikke jetip, byltyrǵy jylmen salystyrǵanda 33,3 paiyzǵa ósken. Týrizm salasynda kórsetilgen qyzmetter kólemi 1,6 esege ulǵaidy. 2022 jyly Mańǵystaý óńirine shetelder men el aimaqtarynan 231 myń týrist keldi.
Memleket basshysyna aýyzsý máselesin sheshý jónindegi tapsyrmasynyń oryndalý barysy týraly málimet berildi. Atap aitqanda, byltyr 12 aýylǵa sý qubyry tartyldy. Oblystaǵy aýyzsý tapshylyǵyn kezeń-kezeńimen sheshý úshin 2025 jylǵa deiin jalpy sý tushytý qýaty 286 myń tekshe metr bolatyn 9 joba júzege asyrylady.
Sonymen qatar Prezidentke óńir basshysy turǵyn-úi kommýnaldyq sharýashylyq salasyn jetildirý, Aqtaý qalasynyń injenerlik infraqurylymyn qalypqa keltirý, MAEK kásipornyn qaita jańǵyrtý máseleleri jóninde baiandaldy.
Prezidenttiń qabyldaýynda bolǵan Túrkistan oblysynyń ákimi Darhan Satybaldy byltyr jalpy óńirlik ónim kólemi 3 trillion teńgeni quraǵanyn, al aýyl sharýashylyǵyndaǵy ónim kólemi alǵash ret 1 trillion teńgeden asqanyn aitty. Salaǵa 75 milliard teńge investitsiia tartyldy. Sonymen qatar shaǵyn jáne orta biznes sýbektileriniń sany 184 579-ǵa jetken.
Memleket basshysyna sý qubyry buryn-sońdy bolmaǵan jeti eldi mekenniń aýyzsýmen qamtamasyz etilgeni jóninde málimet berildi. Biyl 25 eldi mekenge aýyzsý qubyryn tartyp, tozyǵy jetken sýmen qamtamasyz etý jelisin jańartý josparlanyp otyr. Sondai-aq 56 eldi meken tabiǵi gaz qubyryna qosylyp, 47 eldi mekenniń elektr jelileri jańartylady.
Oblys ákimi ótken jyly 54 mekteptiń qurylysy júrgizilip, onyń 21-i paidalanýǵa berilgenin jetkizdi. Biyl taǵy 20 mekteptiń qurylysyn aiaqtaý josparlanyp otyr. «Jaily mektep» ulttyq jobasy aiasynda óńirde 63 bilim mekemesiniń qurylysy maquldandy. Budan bólek, biyl aýyldyq jerlerde 49 meditsina nysany salynady.
Prezidentke Syrdariia ózeni boiyndaǵy eldi mekenderdi sý basý qaýpiniń aldyn alý úshin júrgizilgen jumystar jóninde baiandaldy. Aldyn ala qamdanǵannyń nátijesinde bes aýdandaǵy 43 eldi mekendi sý basý qaýpi joiylǵan. Tolassyz jaýǵan nóser jaýyn saldarynan birqatar aýdanda jekelegen úi aýlalaryn sý basyp qalǵandyqtan, 200-ge jýyq adam qaýipsiz jerge kóshirildi. Qazir jaǵdai turaqtanyp, turǵyndar úilerine oraldy. Arnaiy komissiia shyǵyn kólemin anyqtap jatyr.
Prezidentke Soltústik Qazaqstan oblysynyń ákimi Aidarbek Saparov aýyl sharýashylyǵyn damytý jáne investitsiialyq jobalardy júzege asyrý máseleleri jóninde baiandady.
Oblys ákiminiń aitýynsha, aýyl sharýashylyǵy men ónerkásip salalarynda quny 160 milliard teńgen bolatyn 62 investitsiialyq joba iske asyrylady. Sondai-aq óńirge 430 milliard teńge investitsiia tartý josparlanyp otyr, onyń jartysy aýyl sharýashylyǵyna bólinedi.
Prezidentke kóktemgi egis naýqanyna daiyndyq jumystary týraly da aqparat berildi. Qazirgi ýaqytta 489 myń tonna tuqym sebilip, 180 myń tonna mineraldy tyńaitqysh beriledi. Sonymen qatar biyl aktsionerler jańa tútin qubyryn salýǵa jáne JEO-2 qazandyq agregattaryn kúrdeli jóndeýden ótkizýge 6 milliard teńge bóledi. 1,1 milliard teńgege 7,2 shaqyrym jylý jelilerin jóndeý jáne qaita jańartý josparlanyp otyr.
Oblys ákimi óńirde 650 shaqyrym jol jóndelip, 300 myń sharshy metr turǵyn úi salynatynyn jetkizdi. 16 myńnan astam adam turatyn 22 aýyldy sýmen qamtamasyz etý isi jaqsartyldy.
«Jaily mektep» jáne «Aýyldyq densaýlyq saqtaýdy jańǵyrtý» ulttyq jobalary aiasynda mektepter men meditsinalyq mekemelerdiń qurylysy týraly aqparat jeke usynyldy.
Odan keiin Qaraǵandy oblysynyń ákimi Ermaǵanbet Bólekpaev Prezidentke turǵyn úi-kommýnaldyq sharýashylyǵy men áleýmettik salalarda atqarylyp jatqan jumystardyń jai-kúii, investitsiia tartý isi, ónerkásip jáne aýyl sharýashylyǵy óndirisiniń qarqyny týraly málimet berdi.
Ermaǵanbet Bólekpaev 53 iri jobany júzege asyrý qolǵa alynǵanyn, nátijesinde 12 myń jumys orny ashylatynyn aitty. Onyń aitýynsha, oblysta shaǵyn jáne orta biznes sýbektileriniń sany artyp keledi. Jergilik organdar quny 18 milliard teńge bolatyn 5,5 myń jobany qarjylandyryp 5,8 myń jumys ornyn ashýdy josparlap otyr. Sonymen qatar byltyr óńirde 597,2 myń sharshy metr turǵyn úi paidalanýǵa berildi. Aýyl sharýashylyǵy salasynda ótken jyly 1,2 million gektardan astam jer qaitaryldy. Biyl igerilmei jatqan 580 myń gektar jerdi qaitarý josparlanyp otyr.
Memleket basshysyna áleýmettik saladaǵy josparlar jóninde baiandaldy. Atap aitqanda, aýyldyq eldi mekenderde 92 meditsina nysany salynady, aýyldyq jerlerdegi densaýlyq saqtaý salasyn jańǵyrtý aiasynda 2 aýdanaralyq aýrýhana qurylady. Sondai-aq Qaraǵandy meditsina ýniversiteti janynan 300 oryndyq klinika men 200 oryndyq perinataldyq ortalyq salý qarastyrylǵan. Oblysta 2023–2025 jyldar aralyǵynda 18 zamanaýi mektep salynýǵa tiis.
Kezdesý sońynda Qasym-Jomart Toqaev oblystardyń ákimderine byltyr óńirlerge jumys sapary barysynda bergen tasyrmalary ýaqytyly ári sapaly oryndalýǵa tiis ekenin aitty. Sondai-aq óńirlerdiń ornyqty áleýmettik-ekonomikalyq damýyn odan ári qamtamasyz etýdi jáne azamattardyń turmys sapasyn jaqsartý jumystaryn jalǵastyrýdy tapsyrdy.
