Foto: Akorda.kz
Prezident birqatar memlekettiń elshicinen senim gramotalaryn qabyldady, dep habarlaidy "Ult aqparat" Aqordanyń baspasóz qyzmetine silteme jasap.
«Aqorda» rezidentsiiasynda on tórt memlekettiń tótenshe jáne ókiletti elshisiniń Prezident Qasym-Jomart Toqaevqa senim gramotalaryn tapsyrý rásimi ótti.
Senim gramotalaryn Shveitsariia Konfederatsiiasynyń elshisi Salman Bal, Litva Respýblikasynyń elshisi Egidiiýs Navikas, Cheh Respýblikasynyń elshisi Pavol Shepeliak, Úndistan Respýblikasynyń elshisi Nagendra Prasad, Iordaniia Hashimit Koroldiginiń elshisi Hamza Mahmýd Iýsef Ál-Omari, Niderland Koroldiginiń elshisi Nikolaas Iakob Shermers, Qasietti Taqtyń Qazaqstandaǵy apostoldyq nýntsii Djordj Djordj Panamtýndil, Sloveniia Respýblikasynyń elshisi Daria Bavdaj Kýret, Ýganda Respýblikasynyń elshisi Mozes Kavaalýýko Kizige, Gana Respýblikasynyń elshisi Lesli Acha Opoký-Ýare, Shyǵys Ýrýgvai Respýblikasynyń elshisi Daniel Rýben Kastilos Gomes, Efiopiia Federativtik Demokratiialyq Respýblikasynyń elshisi Adem Muhammed Mahmýd, Daniia Koroldiginiń elshisi Iakob Henningsen, Nepal Federativtik Demokratiialyq Respýblikasynyń elshisi Milan Radj Týladhar tapsyrdy.
Memleket basshysy diplomattarǵa elimiz BUU Jarǵysynyń maqsattary men qaǵidattaryna negizdelgen ádiletti álem ornatý tártibin jaqtaitynyn aitty.
– Qazaqstan eldiń qaýipsizdigi men ornyqty damýyn qamtamasyz etýge baǵyttalǵan beibit syrtqy saiasat júrgizedi. Biz sizderdiń memleketterińizben ózara tiimdi, dostyq qarym-qatynastardy keńeitýge jáne nyǵaitýǵa múddelimiz, – dedi Prezident.
Qasym-Jomart Toqaev Qazaqstannyń ekonomikalyq damý turǵysynan keleshegi zor ekenin, elimizdi álemdik ekonomikanyń mańyzdy bóligine ainaldyrý úshin barlyq múmkindikti jasaitynyn atap ótti.
– Elimiz – Ortalyq Aziia óńirindegi ekonomikasy eń damyǵan memleket. Biraq biz munymen toqtap qalmaimyz. Ekonomikamyzdy odan ári ornyqty damytý úshin bar kúsh-jigerimizdi jumsaimyz, – dedi Memleket basshysy.
Prezident saltanatty rásim sońynda elshilerdi Qazaqstandaǵy diplomatiialyq missiiasynyń resmi túrde bastalýymen quttyqtap, ekijaqty yntymaqtastyqty odan ári nyǵaitý isinde tabys tiledi. Qasym-Jomart Toqaev senim gramotalaryn tapsyrǵan elshiler memleketteriniń basshylaryna izgi tilegi men sálemin joldady.
