Memleket basshysy Qasym-Jomart Toqaevqa Atyraý jáne Aqtóbe oblystarynyń ákimderi óńirlerde qalyptasqan qazirgi sanitarlyq-epidemiologiialyq jáne áleýmettik-ekonomikalyq jaǵdaidy telefon arqyly baiandady.
Bul týraly óziniń Facebook paraqshasynda QR Prezidentiniń baspasóz hatshysy Berik Ýáli jazdy, dep habarlaidy "Ult aqparat".
Atyraý oblysynyń ákimi Mahambet Dosmuhambetov Prezidentke aimaq turǵyndaryna vaktsina salý barysy, iri ónerkásip kásiporyndarynyń suranysyna bailanysty vaktsina kólemin arttyrý qajettigi týyndap otyrǵany týraly aitty.
Qasym-Jomart Toqaevqa oblystyń Úkimetpen birlese otyryp, damýdyń keshendi josparyn ázirleý jónindegi Memleket basshysynyń buǵan deiin bergen tapsyrmalarynyń oryndalý barysy týraly baiandaldy. Ákimniń aitýynsha, atalǵan jospardyń iske asyrylýy oblystyń áleýmettik-ekonomikalyq damýyna tyń serpin berip, jergilikti turǵyndardyń turmys sapasyn arttyrady.
Memleket basshysy Atyraý oblysynyń ákimine meditsinalyq qyzmet kórsetý salasyndaǵy ózekti máselelerdi sheshý, sondai-aq, mektepterdegi bilim berý sapasyn arttyrý jóninde birqatar tapsyrma berdi.
Aqtóbe oblysynyń ákimi Ońdasyn Orazalin Prezidentke koronavirýs indetine qarsy kúres boiynsha qabyldanyp jatqan sharalar jaiynda esep berdi. Sonymen qatar Memleket basshysyna óńirdiń áleýmettik-ekonomikalyq damýynyń negizgi kórsetkishteri, sonyń ishinde, investitsiia tartý, turǵyn úi salý, Indýstriialandyrý kartasy aiasyndaǵy jobalardyń júzege asyrylýy jóninde baiandaldy.
Áńgimelesý sońynda Qasym-Jomart Toqaev Ońdasyn Orazalinge óńirdegi sanitarlyq-epidemiologiialyq ahýaldy turaqtandyrýǵa jáne azamattardy vaktsinalaý jumystaryn jandandyrýǵa qatysty birqatar tapsyrma berdi.
