Foto: Aqorda
Memleket basshysy Qasym-Jomart Toqaevtyń qatysýymen 8 naýryz – Halyqaralyq áielder kúnine arnalǵan saltanatty jiyn bastaldy. Bul týraly Aqorda málim etti.
— Búgin men barshańyzdy kóktem merekesi — Halyqaralyq áielder kúnimen shyn júrekten quttyqtaimyn! Bul meiramdy shyn máninde sulýlyqtyń kórinisi deýge bolady. Sebebi áiel jany qashanda ádemilikke jaqyn. Arýlarymyz álemge súiispenshilikpen qarap, jan-jaǵyna jaqsylyq sharapatyn syilap júredi. «Áiel bir qolymen besikti terbetse, bir qolymen álemdi terbetedi» degen sóz beker aitylmaǵan. Áiel — shańyraqtyń shyraǵy, ulttyń uiytqysy. Ana — tirshilik pen berekeniń bastaýy, adamzat boiyndaǵy bar izgiliktiń qainar kózi. Ananyń aialy alaqany men sheksiz meiirimi ár úige jylylyq beredi. Salt-dástúrimiz ben ana tilimizdiń búgingi kúnge jetýi de — eń aldymen, analardyń arqasy. Ómirdiń máni de, tirshiliktiń sáni de — sizder! Sondyqtan búgingi meiramda barsha er-azamattar ózderińizge aq tilegin arnap, yqylas-iltipatyn bildirip jatyr. Solardyń ishinde men de Memleket basshysy retinde áielderge tilegimdi, lebizimdi aityp turmyn, — dedi Prezident quttyqtaýynda.
Qasym-Jomart Toqaev Qazaqstannyń san túrli salada jetistikke jetýine qyz-kelinshekter mol eńbek sińirgenin aitty.
— Halqymyzda erlik pen eldiktiń týyn biik ustaǵan arýlar az emes. Olardyń esimi el shejiresine altyn árippen jazylǵan. Tumar men Bopai hanymdardyń, Domalaq ana, Zere jáne Ulpan analardyń, Áliia, Mánshúk, Hiýaz sekildi batyr qyzdarymyzdyń aty el jadynda. Sizderdi aqyly men ajary, danalyǵy men daralyǵy kelisken qazaq áieliniń izbasary deýge bolady. Áielder qaýymy kúrdeli kezeńderde aianbai eńbek etti, Otanymyzdyń ósip-órkendeýine belsene atsalysty. Urpaq tárbiesi — ult tárbiesi. Búginde Sizder sanasy sergek, oiy azat urpaq ósirip, Otanymyzdyń órken jaiýyna airyqsha úles qosyp kelesizder. Qazaqstannyń san túrli salada jetistikke jetýine qyz-kelinshekterimiz mol eńbek sińirýde. Búgin Aqordaǵa shaqyrylǵan áielder arasynda Otanymyzǵa ár salada eńbek sińirgen bilikti mamandar bar. Men barshańyzǵa zor alǵys aitamyn, — dedi Memleket basshysy.
Memleket basshysy analary alańsyz qoǵamda balalar da baqytty ómir súretinin aitty.
— Qymbatty hanymdar, Sizder, álemge ádemilik pen úilesim, shańyraqqa jylylyq pen jailylyq syilap kelesizder. Sizderge óskeleń urpaqty tárbieleý, otbasylyq qundylyqtardy ilgeriletý sekildi airyqsha jaýapkershilik júktelgen. Barlyq salada adal eńbek etip, tabandy da tiimdi jumystaryńyzben memleketimizdiń áleýeti men bedelin nyǵaityp júrsizder. Analary alańsyz qoǵamda balalar da baqytty ómir súredi. Ana men balanyń jaǵdaiy durys bolsa, áleýmettiń jaǵdaiy da durys bolady. Sondyqtan bolashaǵyn oilaǵan el, eń aldymen, áielderdiń jaǵdaiyn jaqsartýdy oilaidy, — dedi Qasym-Jomart Toqaev.
Prezident memlekettiń áielderdi barynsha qorǵaýǵa jáne jan-jaqty qoldaýǵa basa mán beretinin atap ótti.
— Memleketimiz áielderdi barynsha qorǵaýǵa jáne jan-jaqty qoldaýǵa basa mán beredi. Osy baǵytta naqty jumystar atqarylyp jatyr. Meniń tapsyrmammen otbasy institýtyn nyǵaitýdy kózdeitin mańyzdy sharalar qabyldandy. Barlyq aimaqta qiyn jaǵdaiǵa tap bolǵan otbasylarǵa qoldaý kórsetetin ortalyqtar ashylyp jatyr. Kóp balaly analardy qoldaýdyń ulttyq modeli qalyptasty. Sonyń arqasynda jyl ótken saiyn kóp balaly otbasylardyń sany artyp keledi, — dedi ol.
Qasym-Jomart Toqaev áielderdiń laýazymdy qyzmetterdi jaýapkershilikpen atqaryp júrgenin jetkizdi.
– Qazir áielder túrli salada tabysty eńbek etip júr. Memlekettik qyzmetshilerdiń jartysynan kóbi – áielder. Bilim berý, densaýlyq saqtaý salasyndaǵy mamandardyń 70 paiyzdan astamy da – áielder qaýymy. Sondai-aq olar tótenshe jaǵdailar, qorǵanys jáne quqyq qorǵaý organdarynda tabysty jumys istep júr. Kóptegen áielder laýazymdy qyzmetter atqarady, Sizderdiń aralaryńyzda da tabysty basshylar az emes. Qyz-kelinshekter bizneste de jetistikke jetip júr. Boilaryńyzdaǵy maqsatkerlik pen jasampazdyq qýaty eń batyl bastamalaryńyzdy júzege asyrýǵa kómektesip keledi. Berik azamattyq ustanymdaryńyzdy tanytyp, qoǵamdyq jumysqa da jan-jaqty atsalysasyzdar. Mańyzdy bastamalar men halyqqa qajetti áleýmettik jobalardy iske asyryp júrsizder. Qai ispen ainalyssańyzdar da jaýapkershilikpen qarap, udaiy oń nátijege qol jetkizip kelesizder, – dedi Prezident.
«Qazaqstannyń eńbek sińirgen qurylysshysy», «Qazaqstannyń eńbek sińirgen ónerkásip qairatkeri» qurmetti ataqtary alǵash ret tabystaldy.
– Álemdik dodalarda top jaryp, elimizdiń abyroiyn asqaqtatyp júrgen arýlarymyz da bar. Biz qajyrly eńbegimen, eren erligimen tanylǵan qyz-kelinshekterdi maqtan tutamyz. Táýelsizdik jyldary óz salasynyń úzdigi atanǵan 8 áielge «Qazaqstannyń Eńbek Eri» ataǵy berildi. Biyl elimizde – «Jumysshy mamandyqtary jyly». Qazir osy saladaǵy bilikti mamandardyń mártebesin kóterý úshin belsendi jumys júrgizilip jatyr. Mysaly, memlekettik marapattar júiesine jańadan 9 qurmetti ataq engizildi. Búgin osyndai eki marapat alǵash ret tapsyrylady. «Qazaqstannyń eńbek sińirgen qurylysshysy» ataǵy eńbek ardageri Olga Shelýdkoǵa beriledi. Al óndiris ozaty Maira Ermanova «Qazaqstannyń eńbek sińirgen ónerkásip qairatkeri» atanyp otyr. Osyndai naǵyz eńbek adamdaryna búkil el bolyp qurmet kórsetip, olardy jan-jaqty dáripteýimiz kerek. Jumysshy mamandyqtary jylynyń túpki máni de – osy, – dedi Memleket basshysy.
Eske sala keteiik, memlekettik nagradalar júiesine 9 jańa qurmetti ataq engizilgen bolatyn.
