Foto: Akorda.kz
Memleket basshysy Ana men bala ulttyq ǵylymi ortalyǵyna bardy, - dep habarlaidy "Ult aqparat" Aqorda saityna silteme jasap.
Qasym-Jomart Toqaev osy ortalyqtaǵy Smart synyptyń jumysymen tanysty. Em alyp jatqan balalar oqýdan qol úzip qalmaýy úshin "Aqyldy synyp" uiymdastyrylǵan. Munda mektep baǵdarlamasyna sáikes matematika, tarih jáne basqa da pánder oqytylady. Sondai-aq mýzykanyń jáne ertegilerdiń kómegimen terapiia sabaqtary, túrli shyǵarmashylyq oiyndar men shahmat úiirmesi qarastyrylǵan.
Prezident respýblikanyń ár óńirinen kelip, em alyp jatqan balalarmen jáne olardyń ata-analarymen áńgimelesti. Memleket basshysy jetkinshekterdiń tezirek saýyǵyp ketýine tilektestik bildirdi. Qasym-Jomart Toqaev Balalar jylynyń aiasynda bilim, densaýlyq saqtaý, sport jáne basqa da salalarda jetkinshekterge kóńil bólingenin aityp, budan ári de qoldaý sharalary jalǵasatynyn jetkizdi.
Prezidentke balalar bólimshelerinde 351 bala em alyp jatqany týraly baiandaldy. Biyl bul jerde 18 myńǵa jýyq bala emdelgen. Keiingi 3 jylda Ana men bala ulttyq ǵylymi ortalyǵyna 30-dan astam jańa meditsina tehnologiiasy engizilip, mamandary shetelde biliktiligin jetildirgen.
Kezdesý sońynda Prezident balalardy Jańa jyl merekesimen quttyqtap, barlyǵyna syilyq úlestirdi.
