Prezident Qasym-Jomart Toqaev Almatyda qaiǵyly oqiǵa kezinde qaza tapqan politsiia qyzmetkerleri men áskeri qyzmetshilerdiń týǵan-týystarymen kezdesti. Memleket basshysy qaiǵyra kóńil aityp, otbasy múshelerimen áńgimelesti. Olarǵa memleket tarapynan jan-jaqty qoldaý kórsetiletinin atap ótti, dep habarlaidy Aqordanyń baspasóz qyzmeti.
– Olar halqymyzdyń qaýipsizdigi úshin, elimizdiń bolashaǵy úshin óz jandaryn qurban etken naǵyz batyrlar. Biz olardyń erligine tántimiz, eshqashan umytpaimyz. Olar halqymyzdyń jadynda máńgi saqtalady. Sizderdiń otbasylaryńyz nazardan tys qalmaitynyna sóz beremin. Baspana bolsyn, balalardyń oqýy bolsyn barlyq máselege árqashanda kómek kórsetetin bolamyz, – dedi Prezident.
Qasym-Jomart Toqaev áskeri jáne qyzmettik mindetin oryndaý kezinde kórsetken batyrlyǵy men jankeshtiligi, memleket múddesin qorǵaý barysynda kórsetken erlikteri úshin birine jar, birine áke bolǵan marqumdarǵa berilgen nagradalardy týǵan-týystaryna tabys etti.
Atap aitqanda, UQK Shekara qyzmeti akademiiasynyń kafedra bastyǵy Andrei Kabdinovtiń jary men ulyna II dárejeli «Aibyn» ordeni, Almaty qalasy Almaly aýdany politsiia basqarmasynyń politsiia-júrgizýshisi Álen Asylhanovtyń jaryna, sondai-aq Almaty qalasy Almaly aýdany politsiia basqarmasynyń politsiia-júrgizýshisi Rinat Kambetovtiń jaryna III dárejeli «Aibyn» ordeni berildi.
Sodyrlar qolynan qaza tapqan marqumdardyń týystary budan bylai bizdiń elimizde dál osyndai qaiǵyly oqiǵanyń bolmaitynyna senim bildirdi.
