Memleket basshysy Qasym-Jomart Toqaevtyń tapsyrmasymen Prezident Ákimshiliginiń basshysy Murat Nurtileý Ulytaý óńiriniń barlyq deńgeidegi máslihattarynyń jiynyna qatysý úshin jumys saparymen Jezqazǵan qalasyna bardy, dep habarlaidy Aqordanyń baspasóz qyzmeti.
Depýtattar jiynynda Murat Nurtileý Prezidenttiń Ulytaý oblysynyń ákimi laýazymyna Berik Ábdiǵaliuly men Serik Shaidarovtyń kandidatýralaryn usyný týraly hatyn oqyp berdi.
Ashyq daýys berý nátijesinde 64 depýtattyń 51-i Berik Ábdiǵaliulyn qoldady, 13 depýtat Serik Shaidarovqa daýys berdi. Budan keiin Memleket basshysy Berik Ábdiǵaliulyn Ulytaý oblysynyń ákimi laýazymyna taǵaiyndaý týraly Jarlyqqa qol qoidy.
Jańadan qurylǵan oblystyń aktivimen kezdesýde Prezident Ákimshiliginiń basshysy taǵaiyndalǵan ákimniń osy oblysta dúniege kelgenin, Ulytaý aýdany men Jezqazǵan qalasynyń ákimi laýazymdarynda qyzmet etkenin jáne Parlament Májilisiniń depýtaty bolǵanyn atap ótti.
Jiynda Murat Nurtileý Memleket basshysynyń Ulytaý oblysyn qurý týraly sheshimi halqymyzdyń birligi men tutastyǵynyń simvolyna ainalǵan qasietti Ulytaý aimaǵyn jańǵyrtýǵa jol ashatyn tarihi oqiǵa ekenin aitty. Onyń pikirinshe, jańa óńirdiń qurylýy aimaq turǵyndarynyń qordalanǵan máselelerin sheshýge, óńirdiń áleýmettik-ekonomikalyq damýyna eleýli septigin tigizedi.
Sondai-aq Murat Nurtileý jańa ákimge barlyq memlekettik organdar men mekemelerdiń qalypty jumys isteýin qamtamasyz etý jáne halyqtyń ál-aýqatyn arttyryp, óńirdi damytý siiaqty mindetter júktelip otyrǵanyn jetkizdi.
Prezident Ákimshiliginiń basshysy óńirdiń iri ónerkásip aimaǵyna ainalýǵa múmkindigi zor ekenine nazar aýdardy. Sonymen qatar oblys aýmaǵynan ótetin kúre joldarǵa aiyryqsha mán berip, óńirdi elimizdiń ońtústik, shyǵys jáne soltústik óńirlerin bailanystyratyn iri kólik-logistikalyq jelige ainalýy tiis ekenin atap ótti.
