11 maýsymda jańadan qurylǵan Abai oblysynyń ákimi taǵaiyndaldy, dep habarlaidy "Ult aqparat".
5 maýsymdaǵy refrendýmnan keiin qabyldanǵan QR Konstitýtsiiasyna engizilgen ózgeristerge sáikes, Memleket basshysy Abai oblysy ákimi laýazymyna jergilikti máslihattardyń qaraýyna Smailov Ashat Saidahmetuly men Uranhaev Nurlan Telmanulynyń kandidatýralaryn usyndy.
Aita ketý kerek, oblys aýmaǵynda ornalasqan máslihattar, Respýblikalyq mańyzy bar qalalar men astana máslihattarynyń ákimderdi kelisýi is júzinde alǵash ret jańadan qurylǵan úsh óńirde – Abai, Jetisý, Ulytaý oblystarynda ótkizildi. Bul - konstitýtsiialyq túzetýlerge engizilgen tetikterdi is júzinde tekserýge jaqsy múmkindik.
Jinalysqa Memleket basshysynyń atynan Qazaqstan Respýblikasy Prezidenti Ákimshiliginiń Basshysy Murat Nurtileý qatysty. Sondai-aq Abai oblysynyń barlyq deńgeidegi máslihattarynyń jinalysyna 114 depýtaty qatysty.
Kandidattar Abai oblysynyń áleýmettik-ekonomikalyq damý baǵdarlamalaryn usyndy. Mysal retinde, kandidattardyń baǵdarlamalary jeńil ónerkásipti qalpyna keltirý, oblystyń aýyl sharýashylyǵy, taý-ken óndirisi áleýetin paidalaný siiaqty negizgi baǵyttardy qamtidy. Sonymen qatar Semei qalasynda injenerlik infraqurylym men kommýnikatsiia, jylý júiesine basa nazar aýdarý kerek ekeni atap ótildi.
Ashyq daýys berý nátijesinde 25 depýtat Ashat Smaiylovqa, 89 depýtat Nurlan Uranhaevqa daýys berdi.
Prezident Ákimshiliginiń basshysy jańadan qurylǵan oblystyń ákimin tanystyra kele, Nurlan Uranhaevtyń Semei qalasynda dúniege kelgenin jáne onyń jaýapty basqarýshylyq qyzmetterde tájiribesi mol ekenin atap ótti. Murat Nurtileý oblysqa qazaqtyń uly aqyny Abai esiminiń berilýi halyqtyń rýhyn kóteretin tarihi ári ádil sheshim bolǵanyn aitty.
Kezdesý sońynda Murat Nurtileý Nurlan Uranhaevqa oblys turǵyndarynyń igiligi úshin Prezident júktegen mindetterdi abyroimen atqarýdy tiledi.
Aita keteiik, Uranhaev Nurlan Telmanuly – 57 jasta, Semei qalysynda dúniege kelgen.
Eńbek jolyn óndiristegi slesar-montajdaýshydan bastaǵan. Nur-Sultan jáne Almaty qalalarynyń, Shyǵys Qazaqstan oblysy ákimdikteriniń energetika, turǵyn úi-kommýnaldyq sharýashylyq jáne qurylys basqarmalarynyń basshysy, ShQO, Qyzylorda oblysy ákiminiń orynbasary, Qazaqstan Respýblikasy Prezidenti Ákimshiliginiń memlekettik inspektory retinde qyzmetterdi atqardy. «Qurmet» jáne «Parasat» ordenderimen marapattalǵan.
Jańadan taǵaiyndalǵan oblys ákimi qoǵam ókilderi tarapynan da qoldaý tapty. Sonymen qatar, Semei jurtshylyǵy jańa Abai oblysyn qurý týraly Prezident sheshimin úlken qýanyshpen qabyl alǵandyǵyn jáne Memleket basshysyna zor alǵystaryn bildirdi.
«Árine, Abai oblysynyń bolýy erekshe qýanysh. Sonymen qatar, jańa taǵaiyndalǵan ákimge jáne barshamyzǵa úlken jaýapkershilik. «Jumyla kótergen júk jeńil» deidi dana halqymyz. Hakim Abaidyń atyna kir keltirmei, bilek sybanyp birge jumys isteiik aǵaiyn. Táýelsiz Qazaq Eliniń kókjiegi kórkem bolsyn!» - dedi óz sózinde Abaidyń «Jidebai-Bórili» memlekettik tarihi-mádeni jáne ádebi-memorialdyq mýzei-qoryǵynyń direktory Turdyqul Shańbai.
