QR Prezidenti Ákimshiliginiń memlekettik baqylaý jáne aimaqtyq uiymdastyrý bóliminiń meńgerýshisi Nurlan Saýranbaev aimaq basshylaryna «Rýhani jańǵyrý» jobalyq keńseleriniń jumysyna nazar aýdarýdy surady, dep habarlaidy QazAqparat.
«Óńirlerden kelgen esepter áleýmettik máselelerdi sheshýde eriktiler jetkilikti deńgeide tartylmai jatqanyn kórsetedi. Volonterler azamattyq bastamalardyń damýynyń, áleýmettik jaýapkershilik pen patriotizmdi qalyptastyrýdyń faktory sanalady. Qazirgi tańda jeke óńirler ǵana qaiyrymdylyq sharalaryna belsendi túrde volonterlerdi tartyp otyr. Ol aimaqtar: Qyzylorda, Mańǵystaý, Shyǵys Qazaqstan men Túrkistan oblystary», - dedi ol Aqordada ótken jiynda.
Onyń aitýynsha, Aqmola, Túrkistan, Mańǵystaý oblystarynan jáne Almaty qalasynan basqa óńirlerdiń kóbi Qazaqstan Jazýshylar odaǵymen tarihtaný men aimaqtaný baǵyttary boiynsha kelisimge kelmegen.
«Zaman talaptaryn eskere otyryp, iske qazirgi kommýnikatsiialyq trendterdi paidalanyp, tanymal blogerlerdi, halyq súiiktilerin, qoǵamdyq oi kóshbasshylaryn tartý kerek. Máselen, million jazylýshysy bar azamattar mundai jumysqa tartylmaǵan. Sonymen qatar, óńirlerdegi «Rýhani jańǵyrý» jobalyq keńseleriniń jumysyna óńir basshylarynyń nazaryn aýdartsaq deimiz. Qazirgi tańda aimaqtyq jobalyq keńseler KMM, JShS túrinde quqyqtyq formamen aiqyndalǵan. Jobalyq keńselerdiń kóbi jumysyn 2019 jyly bastady. Jyldyń sońyna deiin endi óńirlerde qandai forma tiimdi ekenin aiqyndap alý kerek. Sonymen birge, ol jerdegi qyzmetkerlerdiń sany týrasynda da birizdilik joq. Óńirlerdegi keńselerdiń birinde 4 adam, ekinshisinde 26 adamǵa deiin jumys isteidi. Óńirlik jobalyq keńselerge baǵdarlamany júzege asyrýda úlken jaýapkershilik júktelip otyr», - dedi ol.
Eske sala ketsek, Memlekettik hatshy Qyrymbek Kósherbaevtyń tóraǵalymen Aqordada búgin QR Prezidenti janyndaǵy Qoǵamdyq sanany jańǵyrtý baǵdarlamasyn iske asyrý jónindegi Ulttyq komissiianyń otyrysy ótkizildi.
