Búgin Qazaqstan Respýblikasy Prezidenti Ákimshiliginiń Ótinishterdi qaraýdy baqylaý bólimi Nur-Sultan, Almaty, Shymkent qalalary men barlyq oblysta azamattardy biryńǵai qabyldaý kúnin ótkizdi.
Eldegi epidemiologiialyq ahýaldan týyndaǵan shekteýlerge bailanysty azamattardy qabyldaý beinebailanys júiesi arqyly qashyqtan ótkizildi. Aita keterligi, bólimniń bastamasymen biylǵy shilde aiynan beri Biryńǵai qabyldaý kúnderi ár aidyń sońǵy jumasynda ótkizile bastady.
Prezident Ákimshiliginiń Ótinishterdi qaraýdy baqylaý bólimi daiyndaǵan jańa reglamentke sáikes, ótinish iesine qabyldaý kúninde naqty da dáleldi jaýap berý úshin qabyldaýǵa jazylǵan azamattar kóteretin suraqtar mindetti túrde aldyn-ala pysyqtalatyn bolady. Eger kóterilgen suraq jergilikti atqarýshy organnyń quzyretine kirmeitin bolsa, máseleni birlese qarastyryp sheshý úshin qabyldaýǵa ortalyq memlekettik organdardyń, prokýratýra men ishki ister organynyń ókilderi shaqyrylady.
Barynsha kúrdeli máseleler qarastyrylsa, oǵan Prezident Kómekshisi de aralasady.
28 tamyz kúni ótkizilgen jańa formattaǵy Biryńǵai qabyldaý kúninde Nur-Sultan, Almaty, Shymkent qalalarynyń jáne oblystardyń ákimderi men ákim orynbasarlary 80-nen astam azamatty qabyldady. Prezidenttiń Kómekshisi Tamara Dúisenova Nur-Sultan, Shymkent qalalary men Batys Qazaqstan, Qyzylorda oblystarynda ótken qabyldaýlarǵa beinebailanys arqyly qatysty.
Ótinish ieleri baspanamen qamtamasyz etý, turǵyn-úi kommýnaldyq sharýashylyǵy, eldi-mekenderdi abattandyrý, materialdyq kómek kórsetý jáne basqa da máselelerdi kóterdi.
Is-shara Memleket basshysy «halyq únine qulaq asatyn memleket» tujyrymdamasyn ilgeriletý boiynsha júktegen mindetterdi iske asyrý aiasynda jergilikti atqarýshy organdardyń azamattar ótinishterimen jumysyn jandandyrýǵa baǵyttalǵan.
