Foto: Akorda.kz
«Aqorda» rezidentsiiasynda Memleket basshysy Qasym-Jomart Toqaevtyń tóraǵalyǵymen elimizdiń áleýmettik-ekonomikalyq damýyn boljaý jáne 2024-2026 jyldarǵa arnalǵan respýblikalyq biýdjet jobasynyń máseleleri jóninde jumys keńesi ótti, dep habarlaidy "Ult aqparat" Aqordanyń resmi saityna silteme jasap.
Keńeske Premer-Ministr, qarjy-ekonomikalyq blokqa jaýapty memlekettik organdardyń jáne Ulttyq banktiń, Joǵary aýditorlyq palatanyń basshylary qatysty.
Prezidentke álemdik ekonomikadaǵy trendter, elimizdiń áleýmettik-ekonomikalyq damýyna jasalǵan boljamdar, sondai-aq 2024-2026 jyldarǵa arnalǵan respýblikalyq biýdjet jobasynyń parametrleri týraly málimet berildi.
Jiyn barysynda Memleket basshysy teńgerimdi makroekonomikalyq saiasat júrgizý, memlekettiń áleýmettik salada qabyldaǵan barlyq mindettemelerin saqtaý mańyzdy ekenine nazar aýdardy.
Prezident josparlanǵan infraqurylymdyq jáne áleýmettik jobalarǵa, ekonomikanyń naqty sektoryn qoldaýǵa jáne damytýǵa, jalpymemlekettik shyǵyndarǵa, sonyń ishinde qorǵanys jáne quqyq qorǵaý júieleriniń tiimdiligin arttyrýǵa baǵyttalǵan shyǵyndardy tolyqqandy qarjylandyrý qajet ekenin atap ótti.
Keńes qorytyndysy boiynsha Úkimetke biýdjet protsesine baqylaýdy kúsheitý, makroekonomikalyq turaqtylyqty qamtamasyz etý jáne memlekettik organdardyń qarjy jumsaý tártibin jetildirý jóninde tapsyrma berildi.
