Úkimet otyrysy barysynda Premer-Ministr Álihan Smaiylov sýdaǵy qaýipsizdikti arttyrý boiynsha sharalar qabyldaýdy tapsyrdy, dep habarlaidy "Ult aqparat" primeminister.kz saityna silteme jasap.
Premer-Ministr qazir shomylý maýsymynyń qyzǵan shaǵy ekenin, bul oraida sýdaǵy qaýipsizdik sharalaryn saqtamaýdyń kóp jaǵdaida qaiǵyly oqiǵalarǵa ákeletinin aityp ótti.
1 maýsymnan beri elimizde 140 adam sýǵa ketken, onyń 49-y – balalar. Ótken jylmen salystyrǵanda adamdardyń sýǵa batýy 42%-ǵa qysqarǵan. Premer-Ministrdiń oiynsha, sonda da bul kórsetkish óte joǵary.
«El azamattary balalar qaýipsizdigine saq bolýy qajet. Qaiǵyly jaǵdailarǵa jol bermeý úshin barlyq sharalardy qabyldaýymyz kerek», — dedi Álihan Smaiylov.
Bul oraida Úkimet basshysy Tótenshe jaǵdailar, Ekologiia, geologiia jáne tabiǵi resýrstar ministrlikterine ákimdiktermen birlesip sýdaǵy qaýipsizdik sharalaryn kúsheitýdi, onda qutqarýshylardyń bolýyn baqylaýdy tapsyrdy.
Sondai-aq Álihan Smaiylov halyq arasynda túsindirý jumystaryn keńinen júrgizip, sýǵa túsýge bolmaityn jerlerdi anyq belgileýdi tapsyrdy.
