Premer-Ministr Asqar Mamin Úkimet otyrysynda óńirlerdegi infliatsiia máselesine nazar aýdarýdy tapsyrdy, dep habarlaidy "Ult aqparat".
«Atyraý, Mańǵystaý, Qaraǵandy oblystarynda, Shymkent pen Nur-Sultan qalasynda kórsetkishter respýblikalyq ortasha deńgeiden joǵary. Sonymen birge, Almaty, Atyraý, Nur-Sultan, Qaraǵandy, Qostanai, Jezqazǵan qalalarynda áleýmettik mańyzy bar azyq-túlik baǵalary ósýde. Baqyt Turlyhanuly buǵan qatysty ne aitar edińiz», - dedi Premer-Ministr Saýda jáne integratsiia ministri Baqyt Sultanovqa qarata aitqan sózinde.
Atalmysh máselege qatysty Saýda jáne integratsiia ministri Baqyt Sultanov jyl basynan beri áleýmettik mańyzy bar birqatar taýardyń baǵasy 10 paiyzǵa óskenin aitty.
«Bul jaǵynan jergilikti atqarýshy organdarda barlyq múmkindikter bar. Baǵalardyń ruqsat etilgen shekti mánderin bekitý týraly quqyqtary zańda belgilengen. Biraq, jyldyń basynan beri qarasaq, 66 pozitsiia boiynsha baǵanyń 15 paiyzǵa óskeni baiqalýda. Biraq, birde-bir jaǵdaida tiisti mindettemelerdiń oryndalmaǵanyn kórip otyrmyz. Bul týraly jergilikti atqarýshy organdarǵa ótken aida da aityldy. Biraq, degenmen nátije joq. Sondyqtan, jyldyń aiaǵyna deiin tiisti tapsyrma berildi. Qosymsha nátijesin qarastyrǵannan keiin tiisti sheshimdi qabyldaýdy usynamyz», - dedi ol.
Baqyt Sultanovtyń sózin sensek, deldaldar da máseleni qiyndatyp tur.
«Osy ýaqytqa deiin 8 is qana qozǵalǵan. Biraq, bunyń barlyǵy óndirýshilerge qatysty qozǵalǵan ister. Al deldaldarǵa qatysty eshqandai shara qoldanylmai keledi. Sol sebepti, jergilikti atqarýshy organdar salyq organdarymen, básekelestikti qorǵaý komitetimen birge deldaldar boiynsha naqty jumysty júrgizý kerek bolady», - dedi ministr.
Óz kezeginde Úkimet basshysy azyq-túlik pen taýardyń qymbattaý máselesi Memleket basshysynyń tóraǵalymen ótetin Úkimettiń aldaǵy otyrysynda qaralatynyn atap ótti.
