QR Premer-Ministri Asqar Mamin Petropavl qalasynda turmystyq gazdyń jarylýy men Jambyl oblysynyń Jańatas qalasynda jáne Qyzylorda qalasynda órt shyǵý faktilerine qatysty pikir bildirdi, dep habarlaidy "Ult aqparat".
«Petropavl qalasynda turmystyq gazdyń jarylýy, sondai-aq Jambyl oblysynyń Jańatas qalasynda jáne Qyzylorda qalasynda órt shyǵý faktileri boiynsha Ishki ister ministrligi qylmystyq is qozǵady, tiisti saraptamalar (órttehnikalyq, sot-meditsinalyq jáne jarylys-tehnikalyq saraptamalar) taǵaiyndaldy», - delingen Úkimet basshysynyń depýtattyq saýalǵa bergen jaýabynda.
Onyń aitýynsha, Jambyl oblysy Jańatas qalasyndaǵy órt boiynsha Jambyl oblysy tótenshe jaǵdailar departamentiniń órtterdi zertteý jónindegi mamanynyń aldyn ala qorytyndysyna sáikes, órttiń tehnikalyq sebebi ashyq ottyń janǵysh materialdarǵa (aǵash, qaǵaz, materiia, plastik jáne t.b.) taralýynan bolǵan. Órt páterdegi balalar bólmesinen shyqqan, bul balalardyń otpen oinaýynyń saldary (sirińke, ottyq jáne t.b.) bolýy múmkin.
«Tergeý is-qimyldary aiaqtalǵannan keiin (órttiń sebepterin anyqtaý) tiisti laýazymdy adamdardyń is-áreketterine baǵa beriledi jáne olardyń jaýapkershiligi anyqtalady. Órtter boiynsha qylmystyq isterdi tergeý barysy Ishki ister ministrliginiń erekshe baqylaýyna tur», - dedi A. Mamin.
Budan buryn habarlanǵandai, Májilistiń jalpy otyrysynda depýtattar adam ólimine ákep soqqan Jambyl, Qyzylorda oblystarynda jáne Petropavl qalasynda bolǵan qaiǵyly oqiǵalarǵa bailanysty Úkimet basshysynyń atyna depýtattyq saýal joldaǵan bolatyn.
Osy oraida depýtattar Prmeer-Ministr Asqar Maminnen Tótenshe jaǵdailar ministrligi óńirlerdiń ákimdikterimen birlesip, kópqabatty úilerge, ásirese ýaqytsha baspana men saiajailarǵa, basqa da jaily emes turǵyn úilerge árbir naqty jaǵdaida kómek kórsetý turǵysynan tolyq jumystardy júrgizýdi surady.
