Aqmola oblysynda praimeriz ótkizý erejesiniń talaptaryn buzý jaǵdailary anyqtaldy, dep habarlaidy "Ult aqparat".
Partiianyń baspasóz qyzmetiniń málimetinshe, Aqmola oblysy Sandyqtaý aýdanyndaǵy «Bilim» BPU tóraǵasynyń orynbasary «Nur Otan» partiiasynyń praimerizin ótkizý erejesin buzyp, jappai daýys berýdi uiymdastyrýǵa shaqyrǵan.
30 qyrkúiekte osy másele boiynsha partiianyń Aqmola oblystyq filialynda partiialyq baqylaý komitetiniń otyrysy ótti. Onda Sandyqtaý aýmaqtyq filialy Saiasi keńesiniń biýrosyna partiialyq jaýapkershilik týraly máseleni qaraýdy jáne Sandyqtaý aýmaqtyq filialy tóraǵasynyń birinshi orynbasary L. A. Loviaginaǵa «eskertý» partiialyq jazalaý sharasyn, sondai – aq «Bilim» BPU tóraǵasy J. J. Qaiyrymdenov pen praimeriz erejesin buzǵany úshin «Bilim» BPU tóraǵasynyń orynbasary Iu.Barahoevaǵa sógis túrindegi partiialyq jazany qoldanýdy usyný týraly sheshim qabyldandy.
«Nur Otan» baspasóz qyzmeti Elbasy, Partiia Lideri Nursultan Nazarbaevtyń partiia ishindegi sailaýda ashyq, anyq jáne ádil daýys berýdi qamtamasyz etý qajettigi týraly tapsyrmasyn oryndaý aiasynda Ortalyq apparat jergilikti jerlerdegi osyndai «áreketterdiń» qatań túrde jolyn kesetinin atap ótti.
Praimeriz ótkizý erejesin buzý derekteri boiynsha 8 (800) 080 4441 jedel jelisine (qońyraý shalý tegin) nemese komek@nurotan.kz. elektrondyq poshta arqyly habarlasýǵa bolady. Barlyq jaitterdi Partiialyq baqylaý komiteti egjei-tegjeili zertteidi. Kinálilerge partiiadan shyǵarýǵa deiin qatań sharalar qabyldanatyn bolady.
