Almatyda diplomyn kópshilik aldynda jyrtyp tastaǵandai kórinis jasaǵan kolledj túlegi 5 táýlikke ákimshilik qamaýǵa alyndy. Onyń áreketi áleýmettik jelide keńinen tarap, qoǵamda qyzý talqylanǵan bolatyn, dep habarlaidy ult.kz.
Almaty qalalyq politsiia departamentiniń málimetinshe, oqiǵa jekemenshik kolledjderdiń birinde diplom tabystaý rásiminen keiin bolǵan. Beinejazbada túlek diplomyn jyrtyp jatqandai áser qaldyrǵan.
Alaida tekserý barysynda onyń diplomynyń túpnusqasy, qosymshasy jáne oqý orny bergen resmi muqabasy búlinbegeni anyqtaldy. Beinerolikke aldyn ala daiyndalǵan diplom muqabasynyń kóshirmesi paidalanylǵan.
Soǵan qaramastan beinejazbanyń áleýmettik jelilerde keńinen taralýy jáne qoǵamda túrli pikir týǵyzýy politsiianyń tekserý júrgizýine negiz bolǵan.
Buǵan deiin túlek áleýmettik jelide jariialaǵan beineúndeýinde bul árekettiń prank ekenin aityp, kóshirme muqabany paidalanǵanyn jáne bolǵan jaǵdai úshin keshirim suraǵan edi.
Degenmen bul ony jaýapkershilikten bosatpady.
Politsiianyń habarlaýynsha, tekserý qorytyndysy boiynsha beinejazba avtory Ákimshilik quqyq buzýshylyq týraly kodekstiń 456-2-babynyń 3-1-bóligi boiynsha ákimshilik jaýapkershilikke tartyldy. Sonymen qatar ÁQBtK-niń 434-babynyń 1-bóligi («Usaq buzaqylyq») negizinde sot sheshimimen 5 táýlikke ákimshilik qamaýǵa alyndy.
