"Tulpar-Talgo" poiyzynda jolaýshy qyzdy zorlaǵan jolserikterdiń basshylary jumystan shyǵaryldy. Bul týraly búgin "Jolaýshylar tasymaly" AQ resmi ókili Dias Ahmetshárip aitty, dep habarlaidy Sputnik Qazaqstan.
Ahmetsháriptiń sózine súiensek, poiyzda áiel zorlaǵan jolserikterdiń basshylary da jazasyz qalmaǵan.
"Olardy jumysqa alǵan adamdar, batys filialynyń úsh qyzmetkeri jumystan shyǵaryldy. Jeti adam sógis jáne qatań sógis aldy", - dedi ol astanada jynystyq zorlyq-zombylyqqa qarsy jazany kúsheitý týraly ótken dóńgelek ústelde.
Ahmetshárip "Qazaqstan temir joly" kompaniiasynyń atynan jábir kórgen áielden BAQ aldynda taǵy da keshirim surady.
"Ózimniń eks-áriptesterimniń, kompaniianyń atynan, basymdy iip, sizden resmi túrde keshirim suraimyn. Olar - nadan adamdar, ondai adamdardyń bizdiń aramyzda júrýge eshqandai quqyǵy joq. Sol sebepti olar jazasyn aldy. Ádil jaza ma, joq pa, aldaǵy ýaqytta prokýratýranyń ótinishimen úkim qaita qaralady degen senimdemin", - dedi ol.
Kompaniia ókiliniń aitýynsha, QTJ osy oqiǵadan keiin qaýipsizdik sharalaryn arttyrýǵa kirisken.
"Eń aldymen, dabyl túimeshegi. Ár vagonda, kýpe, platskart vagondary bolsyn, tamaq ishetin ústelderiniń astynda dabyl túimeshegi ornalasady. Eger siz ózińizge qaýip tónip turǵanyn sezseńiz, dabyl túimeshegin basasyz. Dabyl túimeshegi, aldymen, ishki ister organdaryna, joldaǵy politsiia ókilderine kelip túsedi. Bul aldaǵy ýaqytta júzege asady degen oidamyn", - dedi Ahmetshárip.
Budan bólek, erler men áielderdi kýpelerde bólek ornalastyrý máselesi talqylanyp jatyr.
"Bólek-bólek kýpeler iske qosylady. Áielder jol júrse, jolserik áiel bolýy kerek. Eger erler bolsa, jolserik te tiisinshe er adam bolýy shart", - dep atap ótti ol.
Sondai-aq, qaýipsizdik sharalarynyń biri – vagondardy beinebaqylaý kameralarymen jabdyqtaý.
"Osydan bir ai buryn jańa 25 vagondy iske qosqanymyz esterińizde shyǵar. Olardyń barlyǵynda derlik beinebaqylaý kamerasy bar. Ol dálizdi, tambýrdy túsiredi, biraq kýpeni túsire almaidy. Sebebi ol - ár adamnyń jeke keńistigi. Bul zańǵa qaishy. Jyl sońyna deiin osyndai taǵy 68 vagon iske qosylady dep josparlap otyrmyz. Olar qazir qurastyrylyp jatyr", - dedi kompaniia ókili.
Sondai-aq, osy jyldan bastap "Qazaqstan temir joly" kompaniiasy jolserikter úshin psihologtar kabinetin ashady.
Ahmetsháriptiń málimetinshe, búginde jolaýshylar tasymalynda 5500 jolserik jumys isteidi.
Aita ketsek, búgin "Tulpar-Talgo" poiyzynda zorlanǵan áiel el aldyna shyǵyp, basynan ótken sumdyqty jaiyp saldy. Aitýynsha, tańǵy tórtter shamasynda jolserikter áiel jatqan kýpege kirip ony zorlaǵan.
Jábirlenýshi elordada ótken ǵylymi konferentsiiadan Aqtóbege qaityp bara jatqan.
Sot úkimimen eki jolserik te eki jarym jylǵa sottaldy. Alaida jábir kórgen áiel bul úkimmen kelispei otyr.
