"Talgo" poiyzynyń jolserikteri zorlaǵan áiel búgin el aldyna shyǵyp, basynan ótken sumdyq oqiǵany aityp berdi, dep habarlaidy Sputnik Qazaqstan.
"Qaiǵy-qasiretke dýshar boldym"
"Men, shynymen, qaiǵy-qasiretke dýshar boldym. Eń sumdyǵy – oqiǵa qoǵamdyq kólikte boldy. Bizde halyqtyń seksen protsentten astamy poiyzben júredi. Men de dál osy poiyzda zorlyq-zombylyqqa tap boldym. Bul jai ǵana poiyz emes, joǵary sanattaǵy, liýks poiyz", - dedi ol astanada jynystyq zorlyq-zombylyqqa qarsy jazany kúsheitý týraly ótken dóńgelek ústelde.
Qyzdyń aitýynsha, sol kúni ol ǵylymi konferentsiiadan úige qaityp bara jatqan.
"Sol poiyzǵa keshigip bara jatqan edim. Alla meni, múmkin, synaǵan shyǵar. Júrýine úsh minýt qalǵan kezde kirip úlgerdim. Poiyzǵa bilet satyp alǵan ýaqytta óz ómirim úshin alańdaǵan joqpyn, jolserikterdiń kásibiligine sendim. Men áli kúnge deiin óz-ózime kele almai jatyrmyn. Meni tanityndar biledi, sol oqiǵadan beri áli birde-bir joba júzege asqan joq. Ózim biznesmenmin, firmamdy satýǵa týra keldi", - deidi zorlanǵan qyz kózine jas alyp.
Jábir kórgen qyz ádildik ornatý úshin on ai boiy kúresken.
"Men zorlanǵanymdy on ai boiy dáleldedim. Túrli alyp-qashpa áńgime, qaýesetter aityldy. On aiǵa sozylǵan kúresten keiin keibireýlerdiń meniń basymdaǵy jaǵdaidy "bulyńǵyr oqiǵa" dep ataǵanyn estidim. Eshkim jábirlenýshini jaqtamaidy. Bári saǵan aqsha ǵana kerek dep oilaidy", - deidi ábden ashynǵan qyz.
"Bári nege aiǵailaǵan joqsyń dep suraidy"
"Báriniń kókeiinde bir suraq: ol nege aiǵailaǵan joq? Mine, osy jerde psihologtar otyr. Árbiriniń reaktsiiasy ártúrli. Meniń daýsym shyqpai, qozǵala almai qaldym. Bul meniń reaktsiiam. Tańǵy tórtte uiyqtap jatqan kezde, belgisiz bir adamnyń ústińe qulaǵany qandai qorqynyshty sezim ekenin túsine almaisyzdar. Ózińniń qaida ekenińdi bilmeisiń. Jabyq keńistik. Eń bastysy, óltirip tastamasyn dep oilaisyń. Tergeýshiler nege aiǵailaǵan joqsyń dep kóp surady. Mende únemi mynadai suraq týyndaidy: sizder, shynymen, men ekinshi zorlyqshy qashan keledi eken dep kútip jatty dep oilaisyzdar ma? Men "shokta" boldym", - dep jylady jábirlenýshi.
Aitýynsha, sottalǵan jolserik qyzben bir kýpede bolǵan jolaýshylardy basqa oryndarǵa jibergen.
"Men kýpege kirgen kezde, jolserik syra iship otyrdy. Ol buǵan aldyn ala daiyndaldy. Menen sol kúni mas boldyń ba dep kóp surady. Men jolserikpen syra ishken joqpyn", -deidi qyz.
"Tergeýshiler maǵan emes, jolserikterge sendi"
Jábir kórgen qyz tergeýshilerdiń eki tarapty tatýlastyrýǵa múddeli bolǵanyn aitady.
"Men videony qaraǵan kezde, sottalýshylar meniń bailanys telefonymdy tergeýshiler bergenin aitty. 28 qyrkúiek kúni olar maǵan habarlasyp, ata-anama bara jatqanyn aitty. Men olardan áke-shesheme barmaýyn ótindim. Meniń ata-anam qart kisiler. Biraq tergeýshiler eshteńe istegen joq, jolserikterdiń sózine sendi", - deidi ol.
Jábirlenýshi tarap isti Qostanaidan Aqtóbege aýystyrý týraly qoldaýhat túsirgen.
"Isti Qostanaidan Aqtóbege 17 qazannan 27 qarashaǵa deiin tapsyrdy. Iaǵni, isti tapsyrýǵa bir aidan astam ýaqyt jumsady. Men tergeýshige bardym. Olar meni saraptamaǵa jiberdi. Psihologiialyq saraptamaǵa sottalýshylarmen birge jiberdi. Bárimiz bir kezekte turdyq. Tergeýshilerge osy jaily aitqanymda, sýbordinatsiia saqtap, daýsyńdy báseńdet dedi. Olar maǵan aqsha usyndy.
Ol aqshany men eki ai ishinde taba alamyn. Tabysym jaman emes. Men bas tarttym, olardyń jazalanǵanyn qaladym. Jolserikter birneshe ret bergen jaýaptaryn ózgertti. Ata-anama shaqyrý qaǵazy kelgen kezde, men kólik prokýratýrasyna aryz jazýǵa bardym. Menimen sóilesip, meniń kim ekenimdi kórgen kezde, is kishkene qozǵaldy. Saraptama qorytyndysy kelgennen keiin jaǵdai túbegeili ózgerdi", - deidi ol.
Aitýynsha, tergeý barysynda sottalǵandardyń týysqandary qyzdyń sońyna túsip, otbasyna maza bermegen.
"Jábirlenýshi retinde jynystyq zorlyq-zombylyqqa qatysty zańdy qatańdatýdy ótinemin. 2,5 jyl degen ádil jaza dep oilaisyzdar ma? Balalar men áielderdiń qaýipsizdigin qamtamasyz etýdi suraimyn. Beinebaqylaý kamerasy bolǵanda, osynshama ýaqyt dáleldeýge týra kelmes edi", - dedi jábirlenýshi.
Jurttyń jaǵasyn ustatqan oqiǵa
2018 jyldyń qarasha aiynda "NeMolchiKZ" zorlyq-zombylyqqa qarsy qoǵamdyq qozǵalysy" qorynyń basshysy Dina Tańsári (Smaiylova) jantúrshigerlik oqiǵa týraly jazdy.
Onyń aitýynsha, elordadaǵy ǵylymi konferentsiiadan Aqtóbege qaityp bara jatqan áieldi "Tulpar-Talgo" poiyzynda eki jolserik birinen soń biri zorlaǵan.
Sýdia bul oqiǵany jabylyp zorlaý deýdiń ornyna "ádettegi áiel zorlaý" dep baǵalady. Osylaisha Jetes Úmbetaliev pen Qolqanat Qurmaniiazov Qylmystyq kodekstiń 120-baby 1-bóliginiń 1-tarmaǵy (zorlaý) boiynsha kináli dep tanylyp, 2 jyl 6 aiǵa jylǵa bas bostandyǵynan aiyryldy.
Keiin 29 shilde bas kólik prokýrory Ernat Sybanqulov, jolserikterge shyǵarylǵan sot úkimi qaita qaralatynyn málimdedi.
"Qazaqstan temir joly" ulttyq kompaniiasy zorlanǵan áielden keshirim surady.
