Elimizde poiyz biletterin zańdy túrde jappai satyp alýǵa bolatyndyǵy aityldy. Bul týraly «Jolaýshylar tasymaly» AQ bas direktorynyń orynbasary Viktor Boshmann málim etti, dep habarlaidy QazAqparat.
«Halyq arasynda keń taralǵan «alypsatar» áreketin zańdy túrde iske asyrýdyń eki joly bar. Alǵashqy joly týristik agenttikter bilet satylymǵa shyqqan sátten bastap ózderiniń klientteri úshin aldyn ala jappai satyp ala alady. Eń bastysy satyp alynǵan bilettiń barlyǵynda ár adamnyń aty-jóni men JSN-i kórsetilýi tiis. Ekinshi zańdy joly keibir týristik agenttikter jeke tasymaldaýshylardan poiyz biletterin jappai satyp alyp, sosyn ol biletterdi óz klientterine týristik qyzmetimen qosa usyna alady», - dedi Boshmann.
Odan bólek, direktor orynbasary jolaýshylarǵa poiyz biletterin «Qazaqstan temir joly» AQ-nyń resmi saitynan satyp alýǵa keńes berdi.
«Eger bilet joq bolǵan jaǵdaida, onda kútý bóliminen kezek alǵan durys. Sebebi jolaýshy óz biletin qaita ótkizgen jaǵdaida sizge satylymǵa shyqqan bilet týraly habarlama keledi. Taǵy aityp ótetin jait, elektrondy bilet satý júiesi arqyly Qazaqstan boiynsha barlyq baǵyttaǵy poiyzdarǵa bilet satyp alýǵa bolady», - deidi ol.
