Almaty politsiiasy ózine qol salǵan 8 synyp oqýshysyna qatysty istiń tergelip jatqanyn málimdedi, dep habarlaidy QazAqparat.
«Tergeý oqiǵa bolǵan kúni dereý qolǵa alyndy. Isti Bostandyq aýdandyq Politsiia basqarmasy tergep jatyr. 8 synyptyń oqýshysy. Sumdyq jaǵdai. Bala otbasynyń tuńǵyshy, odan bólek 3 balasy bar. Bolǵan jait týraly jurtshylyq biledi dep oilaimyn. Oqiǵa týraly birneshe kún boiy BAQ pen áleýmettik jelide aityldy. Is qaralyp jatyr», - dedi Almaty qalasynyń Politsiia departamenti basshysynyń orynbasary Rýstam Ábdirahmanov tikelei efir kezinde.
Eske sala ketsek, 27 qazanda sabaqtan tys ýaqytta Nazarbaev Ziiatkerlik mektebiniń segizinshi synyp oqýshysyna qatysty qaiǵyly jaǵdai boldy.
Bostandyq aýdandyq politsiia basqarmasy isti QR QK-niń 105-baby «Óz-ózine qol jumsaýǵa jetkizý» boiynsha sotqa deiingi tergep-tekserýdiń biryńǵai tizilimine tirkedi.
Keiin sýitsid jasaǵan oqýshynyń ata-anasy mektep basshylyǵyna, kýrator men psihologqa eshqandai shaǵymdary joq ekenin málim etti.
