Almatyda politsiia qyzmetkerleri aman alyp qalǵan shaqalaqtyń jaǵdaiymen tanysty, - dep habarlaidy Tengrinews.kz.
Qutqarylǵan sábidi kórýge aýrýhanaǵa politsiia qyzmetkerleri Nurjan Shatýnov pen Ǵaziz Hamasqaliev baryp qaitty.
Dárigerler onyń jaǵdaiyn birqalypty aýyr dep otyr.
"Áriptesterimizben birge sábidi "Batyr" dep atap kettik, onyń ómiri úshin úzdik dárigerlerdiń kúresip jatqandyǵyn bilemiz. Olarǵa kóp raqmet. Balaqai qazir jansaqtaý bóliminde jatyr, oǵan qajetti zattardy alyp keldik. Sábige zor densaýlyq, uzaq ǵumyr tileimiz", - dedi Túrksib aýdandyq politsiia basqarmasynyń kámeletke tolmaǵandar isteri jónindegi ýchaskelik inspektory Nurjan Shatýnov.
Eske salaiyq, 25 tamyzda Almatyda politseiler dárethana shuńqyrynan jańa týǵan náresteni alyp shyqqan bolatyn.
