Politsiia qyzmetkerleri Qostanai turǵynynyń vannasynan jylan alyp shyqty, - dep habarlaidy "Ult aqparat" Polisia.kz basylymyna silteme jasap.
20 qazanda "102" pýltine Qostanai turǵynynan vanna bólmesinen jylan tabylǵany týraly habarlama túsken. Oqiǵa ornyna ýchaskelik politsiia inspektory Asqar Mentaev pen onyń áriptesi Serik Malǵajdar barǵan.
"Ótinishti alǵannan keiin mekenjaiǵa keldik. Onda uzyndyǵy 20-25 santimetr jylandy taptyq. Onyń qaidan paida bolǵanyn qazir anyqtap jatyrmyz, ol bireýdiń úi janýary bolǵan tárizdi. Qazir jylannyń iesin izdep jatyrmyz. Oqiǵa ornyna TJM qyzmetkerleri de keldi", - dedi ýchaskelik Asqar Mentaev.
Keiin mamandar ustalǵan jylannyń kádimgi sý jylan ekenin anyqtady. Politsiia qyzmetkerleri jylandy qaladan alyp shyqty.
Basylym málimetinshe, qazan men qarashada sýjylandar túrli shuńqyr men sańylaýǵa enip qystaidy.
