Áleýmettik jelilerde qazaqstandyqtar poiyz biletterine qatysty jańa ózgeristi qyzý talqylaýda. Jolaýshylardyń aitýynsha, endi kóptegen baǵyttarda tómengi oryndardyń baǵasy joǵarǵy oryndarǵa qaraǵanda qymbat bolyp kórsetiledi, dep habarlaidy ult.kz.
Threads jáne basqa da áleýmettik jelilerde jariialanǵan jazbalarda turǵyndar bul ózgeriske narazylyq bildirýde. Olardyń sózinshe, buryn joǵarǵy jáne tómengi oryndardyń baǵasy birdei bolsa, endi tómengi oryn úshin birneshe myń teńge artyq tóleýge týra keledi.
Alaida bul jańashyldyqty qoldaityndar da bar. Keibir jeli qoldanýshylary tómengi orynǵa kóbirek aqsha tólegen jolaýshynyń óz ornyn basqa adamǵa, ásirese jol ústinde aýystyrýdy suraityndarǵa bermeýge tolyq quqyǵy bolýy kerek degen pikirde.
«Endi tómengi oryndy qymbatqa satyp alǵan adamnan “ájeme berińizshi”, “aýysyp jiberińizshi” dep suraityndar azaiady», - dep jazdy jeli qoldanýshylarynyń biri.
Taǵy bir bóligi mundai tásil tómengi oryndarǵa suranysty retteýge múmkindik beredi dep eseptese, endi biri aldymen jolaýshylar vagondarynyń jaǵdaiyn jaqsartyp, sodan keiin ǵana baǵa saiasatyn ózgertý kerek degen pikir bildirdi.
Ázirge «Qazaqstan temir joly» bul máselege qatysty resmi túsinikteme bergen joq.
