Qazaqstan satyp alatyn Pfizer vaktsinasynyń qunyn óndirýshi kompaniia jariia etýge ruqsat bermedi. Bul týraly QR Densaýlyq saqtaý ministri Aleksei Tsoi aitty, dep habarlaidy QazAqparat.
«Buǵan deiin aitqanymdai, qazan men qarasha aiynda kútip otyrmyz. Barlyǵy Pfizer kompaniiasynyń jetkilizimine bailanysty. Baǵasyna qatysty aitar bolsam, qazirgi ýaqytta Pfizer kompaniiasynan málimetterdi jariia etpeý týraly hat aldyq. Sondyqtan da bul másele boiynsha Pfizer kompaniiasyna júginý qajet. Eger olar derekterdi jariia etýge ruqsat berse, onda jariia etemiz. Olai bolmaǵan jaǵdaida, kelisimshart sharty buzylyp, vaktsinany jetkizý merzimi de saqtalmaýy múmkin. Sondyqtan kez kelgen kompaniiamen jumys barysynda kelisimshartty saqtaýǵa tiispiz», - dedi ministr.
Aleksei Tsoidyń aitýynsha, Pfizer kompaniiasy Qazaqstan vaktsinany qansha somaǵa satyp alatyndyǵyn jariialaýǵa ruqsat bermei otyr.
«Biz jeke suranys ta jiberdik. Ony jariia etkimiz de kelgen. Biraq, qazirgi ýaqytta kompaniia bizge bulai jasaýǵa tyiym salyp otyr. Kompaniia bul máseleni taǵy qarastyrady dep oilaimyz. Búgin málimetterdi jariia etýge qatysty taǵy da kelissóz júrgizdik. Degenmen, qazirgi ýaqytta bizde shekteý tur. Sondyqtan qalai múmkindik týyndaidy, birden jariia etemiz. Jalpy, ózge elderdegi baǵamen birdei. Bul, kompaniianyń baǵa saiasaty», - dedi Aleksei Tsoi.
