Pfizer jáne BioNTech kompaniialary AQSh-tyń dári-dármekti qadaǵalaityn oryndarynan 5-11 jastaǵy balalarǵa koronavirýsqa qarsy vaktsina salýǵa ruqsat surady. AQSh-tyń azyq-túlik jáne dári-dármek jónindegi agenttigi (FDA) sarapshylarmen birge kompaniialardyń ótinishin 26 qazanda qaraidy.
Buǵan deiin AQSh-ta atalǵan vaktsinany 12-15 jastaǵy jasóspirimderge shuǵyl jaǵdaida salýǵa ruqsat etilgen. Eger FDA sarapshylary balalarǵa vaktsinany paidalanýdy maquldasa, onda ruqsat berilgennen keiin birneshe kún ishinde 5-11 jas aralyǵyndaǵy shamamen 28 million balaǵa ekpe egile bastaidy.
Densaýlyq saqtaý salasy mamandarynyń aitýynsha, eresekterge qaraǵanda balalarǵa koronavirýstan qatty qaýip tónbese de, kei kezde kovid bala ólimine sebep bolýy múmkin. Amerika pediatriia akademiiasynyń málimetinshe, AQSh-ta shamamen 500 bala koronavirýstan qaitys bolǵan.
Pfizer men BioNTech kompaniialarynyń habarlaýynsha, arnaiy zertteý balalarǵa eresekke salynatyn dozanyń úshten bir bóligi salynýy tiis ekenin kórsetken. Ekinshi dozadan keiin 5-11 jastaǵy balalarda jaóspirimderde siiaqty virýsqa tótep beretin antidene qalyptasady.
Qazaqstan jaqyn arada Pfizer vaktsinasyn 12 jastan bastap balalar men jasóspirimderge salýdy josparlap otyr. Densaýlyq saqtaý ministri Aleksei Tsoi osy aptada Pfizer-diń 4 mln dozasy elge tórtinshi toqsanda jetedi dep málimdegen. Ministr vaktsina balalarǵa ata-analary nemese qamqorshysynyń ruqsatymen salynatynyn aitqan. Ol sonymen birge qajetti uiymdardyń ruqsatyn alǵan kompaniia vaktsinasyn 5 jastan bastap balalarǵa salý múmkindigin de qarastyratynyn aitqan.
