Petropavldaǵy Nazarbaev Ziiatkerlik mektebi oqýshylarynyń uiymdastyrýymen Naýryz merekesine orai virtýaldy túrde «Sadaq atý», «Qazaq kúresi» men «Alaman báigeden» respýblikalyq jarys ótti, dep habarlaidy "Ult aqparat".
Petropavldaǵy Nazarbaev Ziiatkerlik mektebiniń oqýshylary «Minecraft» oiyn platformasynyń múmkindikterin paidalanyp, Naýryz merekesine orai ulttyq oiyndardan saiys uiymdastyrdy. Balalar virtýaldy túrde kiiz úiler tigip, jarys alańdaryn qurastyrdy.
«Minecraft» - mektep oqýshylary arasynda álem boiynsha joǵary suranysqa ie oiyn. Oǵan biz ulttyq qundylyǵymyzdy qosýdy jón sanadyq. Oqýshylar saiys erejelerin ózderi jasady. Platformada balalar bir-birimen kúresip, tipti atqa minip shaba alady. Mergendikterin synap kórý úshin «Sadaq atýdy» tańdadyq. Sheteldik oiynǵa osylaisha ulttyq dúniemizdi qosyp, utymdy paidalandyq», - deidi Petropavldaǵy Nazarbaev Ziiatkerlik mektebi direktory Daniiar Ýáliev.
Petropavldaǵy Nazarbaev Ziiatkerlik mektebi baspasóz qyzmetiniń málimetinshe, jylda NZM jelisinde «Naýryz kezdesýleri» ǵylymi jobalar saiysy uiymdastyrylady. Biyl karantinge bailanysty dástúrli kezdesý onlain formatta ótti. Ulttyq oiyndar saiysy sol is-sharaǵa orailastyrylǵan. Qazaqstandaǵy barlyq Ziiatkerlik mektepterdiń oqýshylary «Minecraft» platformasynda kezdesedi. Sharadan keiin de árbir oqýshy mektep serverinde oiyndy jalǵastyra alady.
Nátijesinde Aqtaýdaǵy NZM oqýshysy Nurgeldi Esengeldi alaman báigeden jeńimpaz atandy. Kúreste Almatydaǵy NZM oqýshysy Maǵjan Ilambek bárinen basym tústi. Al sadaq atýdan Aqtóbe qalasyndaǵy NZM oqýshysy Islam Bagirov mergendigin kórsetti.
Buǵan deiin Petropavldaǵy NZM oqýshylary «Minecraft» platformasynda Soltústik Qazaqstan oblysynyń kieli jerleriniń kartasyna engen nysandardyń dál kóshirmesin jasaǵan bolatyn. Jobaǵa Aiǵanym qonysy, Aǵyntai-Qarasai batyrlar kesenesi, Botai qonysy syndy taǵy basqa nysandar endi. Qazir oǵan kez kelgen oiynshy virtýaldy ǵimarattarǵa kirip saiahat jasai alady.
