Petropavlda kóńil-kóterý orny mańynda tapansha atqan 23 jastaǵy jigit ustaldy, dep habarlaidy QazAqparat.
Soltústik Qazaqstan oblysy politsiia departamenti baspasóz qyzmetiniń málimetinshe, 3 qazanǵa qaraǵan túni Petropavl qalalyq politsiia basqarmasynyń kezekshi bólimine oblys ortalyǵynyń kóńil-kóterý oryndarynyń biriniń mańynda pnevmatikalyq tapanshanyń atylǵany týraly habarlama túsken.
Kýágerlerdiń aitýynsha, mastyqtan týǵan janjal barysynda jas jigit eki ret aspanǵa, keiin bir ret adamnyń keýdesine atqan. Shaqyrtý boiynsha kelgen politseiler 23 jastaǵy kúdiktini ustady.
Atalǵan fakti QR Qylmystyq kodeksiniń 293-baby 3-bóligi «Buzaqylyq» boiynsha Sotqa deiingi tergep-tekserýlerdiń biryńǵai tizilimine engizildi. Tárkilengen kalibri 4,5 mm, «MR» pnevmatikalyq tapansha ballistikalyq saraptamaǵa jiberildi. Jábirlenýshi sot-meditsinalyq saraptama ótkizýden bas tartty.
«Eger adamǵa qarsy pnevmatikalyq qarýdy qoldaný týraly habarlama rastalmasa, qarý iesi qala sheginde pnevmatikalyq qarýdan atqany úshin ákimshilik jaýapqa tartylýy múmkin. Al atys qarýyn, gazdy qarýdy, pyshaqty, kastetti jáne ózge de sýyq qarýdy qoldanyp nemese qoldanýǵa tyrysyp jasalǵan buzaqylyq úsh jyldan jeti jylǵa deiin bas bostandyǵyn shekteý nemese aiyrý jazasyn kózdeitinin eske salamyz», - deidi Petropavl qalalyq politsiia basqarmasy bastyǵynyń birinshi orynbasary Álibek Ǵabdýllin.
